Bul týraly Aqordanyń baspasóz qyzmeti habarlady.
«Baıtaq bolashaq» Ekologııalyq alıansy» RQB prezıdenti Azamathan Ámirtaevpen kezdesý barysynda elimizdegi ekologııalyq ahýal, halyqtyń ekologııalyq túsinigi men mádenıetin arttyrý múmkindikteri sekildi máseleler talqylandy. A.Ámirtaev shaǵyn jáne orta bıznesti qoldaýǵa jáne ekologııalyq jobalardy iske asyrý úshin shetel ınvestısııasyn tartýǵa qatysty birqatar usynys aıtty.
«Qazaqstan barysy» damý qory Qamqorshylar keńesiniń tóraǵasy Arman Shoraev Prezıdentke ishki jáne syrtqy týrızm salasyndaǵy keıbir qordalanǵan problemalardy sheshý joldaryn, qazaq kúresin halyqaralyq arenada ulttyq brend retinde qalyptastyrý jaıyndaǵy kózqarasyn jetkizdi.
Qoǵam qaıratkeri, saıasattanýshy Aıdos Sarymmen kezdesýde Qazaqstandaǵy gýmanıtarlyq ǵylymnyń damý perspektıvalary, elimizdiń qoǵamdyq-saıası ómirine onyń áseri, «Rýhanı jańǵyrý» baǵdarlamasynyń júzege asyrylýy men ıdeologııalyq saıasaty sııaqty máseleler qozǵaldy.
Qasym-Jomart Toqaev Ulttyq qoǵamdyq senim keńesiniń alǵashqy otyrysynan keıin Keńes músheleri tarapynan aıtylǵan usynystar Prezıdent Ákimshiligi men Úkimette ótken jıyndarda talqylanyp, pysyqtaý jumystary júrgizilgenin atap ótti.
– Naqty nátıjelerge qol jetkizdik. Jýyq arada keıbir zańnamalarǵa engiziletin ózgeristerdi pysyqtaý kerek. Sodan keıin Ulttyq keńestiń ekinshi otyrysy shaqyrylady, – dep qorytyndylady Prezıdent.