Bıyl 10-11 qarashada Premer-Mınıstr Asqar Mamın Túrkııa Respýblıkasyna jumys sapary aıasynda Caýda-ekonomıkalyq yntymaqtastyq jónindegi Qazaqstan-Túrkııa úkimetaralyq komıssııasynyń XI otyrysyna jáne Qazaqstan-Túrkııa bıznes-forýmyna qatysady. Bul týraly primeminister.kz habarlady.
Sapar barysynda Úkimet basshysy Asqar Mamın men Túrkııa Respýblıkasynyń Prezıdenti Rejep Erdoǵannyń kezdesýi josparlanǵan.
Qazaqstan–Túrkııa bıznes-forýmyna 150-den astam qazaqstandyq jáne 700 túrik kompanııasynyń ókilderi qatysady. Forým jumysy aıasynda Premer-Mınıstr Asqar Mamın túrik bıznesiniń kóshbasshylarymen, onyń ishinde Yildirim, Ronesans, Kibar, Calik, Koc, Zorlu, Eczacibasi holdıngteriniń basshylyqtarymen birqatar kezdesý ótkizedi.
Forým qorytyndysy boıynsha densaýlyq saqtaý ınfraqurylymyn damytý, týrızmdi, turǵyn úı qurylysyn, sondaı-aq, kóliktik-logıstıkalyq sektordy damytý salasyndaǵy yntymaqtastyq týraly 20-ǵa jýyq qujatqa qol qoıý josparlanǵan.