Álemdik qarjy daǵdarysynyń salqynyn sezingen kásiporyndardyń biri – “MTS Traktor” JShS bolatyn. Kásiporyndy, ondaǵy jumys ornyn saqtaý, bereshekterin óteýge qol jetkizý maqsatynda seriktestikti saýyqtyrý prosedýrasy júrgizilýde. Osy maqsatta oblys ákimdiginiń usynysy boıynsha seriktestik oblys aýmaǵynda shóp taılaǵyshtar, eki qatarly tuqym sepkishter, kóp salaly topyraq óńdeý agregattaryn shyǵaratyn birlesken óndiris oryndaryn qurý jónindegi Qazaqstan- Belorýssııa úkimetaralyq komıssııasynyń quramyna kirgizilgen-di. Bul óz nátıjesin berdi.
Belorýssııanyń “BobrýıskAgroMash” ashyq aksıonerlik qoǵamy shyǵaratyn “PT-165” shóp taılaǵyshtary osy seriktestik bazasynda qurastyrylatyn boldy. Shóp taılaǵyshtardyń osynda qurastyrylýynyń da ózindik sebebi bar. Munda aýyl sharýashylyǵy tehnıkalaryn shyǵarý men jóndeýge qondyrǵylar, qural-jabdyqtar jetkilikti, kásiporynda mundaı jumystardy atqaratyn tájirıbe de, maman kadrlar da bar. Buǵan deıin seriktestik “K-700” traktorlaryn kúrdeli jóndeýmen, aýyl sharýashylyǵy tehnıkalarynyń keıbir qosalqy bólshekterin shyǵarýmen aınalysyp kelgen bolatyn. Endi munda jańa jobalar júzege asyryla bastady. Alǵashqy jetkizilgen segiz shóp taılaǵysh qurastyryldy. Qazirdiń ózinde on besten astam tapsyrys túsip úlgeripti. Bolashaqta seriktestikte shóp taılaǵyshtyń keıbir bólshekterin ózderi jasap, qazaqstandyq úlesti arttyrý kózdelýde. Sondaı-aq, aýyl sharýashylyǵyna qajetti quraldar, basqa da ónimder shyǵaratyn jobalardy júzege asyrý aldaǵy kúnderdiń enshisindegi sharýa.Seriktestik bastapqyda oblystyń sharýashylyq qurylymdarynyń shóp taılaǵyshqa degen suranysyn qanaǵattandyryp, keıin elimizdiń ózge óńirlerine de ónimderin ótkizbekshi. Mundaı shóp taılaǵysh qurastyratyn kásiporyn ázirge Qazaqstanda bireý-aq.
–Oblysta saýyqtyrýǵa jatqyzylǵan tórt kásiporyn bar. Sonyń ishinde osy seriktestiktiń múmkindigi mol. Qazirdiń ózinde jalaqyǵa bereshek tolyq óteldi. Basqa tólemder kestege saı ótelýde. Shóp taılaǵyshtardy seriktestik bazasynda qurastyrý tıimdi. Daıyn shóp taılaǵysh ákelgende vagonǵa ári ketse tórteýi ǵana sııatyn. Bir shóp taılaǵyshty jetkizý 560 myń teńge turady. Al, bólshektep jetkizgende jıyrma shóp taılaǵysh ákelýge bolady. Bul tasymalǵa ketetin qarjyny únemdeýge múmkindik beredi. Sondaı-aq, seriktestikte burynnan eńbek etip kele jatqan jumysshylardy ustaýǵa da yqpal etedi. Bolashaqta shóp taılaǵyshtardyń keıbir bólshekterin osy kásiporynda jasaý da oılastyrylýda. Bir sózben aıtqanda, kásiporynnyń daǵdarys quryǵynan qutylyp, aıaǵynan qaz turyp ketý múmkindigi bar, — deıdi dármensiz boryshkerlermen jumys komıteti “Batys” óńiraralyq departamentiniń bastyǵy Amanǵos Derbisálın.
Satybaldy SÁÝIRBAI.
Aqtóbe oblysy.