Prezıdent janyndaǵy Ortalyq kommýnıkasııalar qyzmetinde agrarlyq ǵylym, bilim berý men aýyl sharýashylyǵy óndirisiniń ózara qarym-qatynasynyń máseleleri jáne sheshý joldaryna arnalǵan baspasóz konferensııasy ótti.
«Ulttyq agrarlyq ǵylymı-bilim berý ortalyǵy» basqarma tóraǵasy Tóleýtaı Rahymbekovtiń aıtýynsha, «Keıbir zańnamalyq aktilerge agroónerkásiptik keshendi retteý máseleleri boıynsha ózgerister men tolyqtyrýlar engizý týraly» Zańda aýyl sharýashylyǵy beıini maman-túlekteriniń tizimin keńeıtý bóliginde «Bilim týraly» zańǵa tıisti ózgerister engizildi. Osyǵan sáıkes agrarlyq sala boıynsha grantpen oqıtyn túlekter budan bylaıǵy ýaqytta menshik nysanyna qaramastan, aýyldyq jerlerde ornalasqan agrarlyq mekemelerde keminde 3 jyl jumys isteýi tıis jáne jumys isteý óńirin anyqtaý boıynsha shekteýlerdi joıý qarastyrylǵan.
Atalǵan ózgerister aýyl sharýashylyǵy mamandyqtary boıynsha oqýdy támamdaǵan aýyl turǵyndary qataryndaǵy azamattarǵa kvotamen jumysqa ornalasýǵa jáne óńirlerdi AО́K kásibı kadrlarymen qamtamasyz etý deńgeıin arttyrýǵa múmkindik beredi. Sondaı-aq búgingi elimizdiń agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasyna ózgerister men tolyqtyrýlar engizý jobasy ázirlendi. Atalǵan másele osy jobada da qarastyrylmaq.
«Qaı zamanda da kez kelgen salanyń nemese memlekettiń damytýshy kúshi ǵylym ekeni barshaǵa málim. Búgingi tańda elimizdiń aýyl sharýashylyǵyn jańa deńgeıge alyp shyǵa alatyn jalǵyz baǵyt bar. Bul – agrarlyq ǵylymnyń damýyna jol ashý. Agrarlyq saladaǵy bilim men ǵylymnyń jáne óndiristiń basyn qosyp, agrosektordyń qarqyndy damýy úshin qyzmet etý – Agrarlyq ortalyqtyń basty maqsaty. Bul ekonomıkanyń jańa sektoryna aınalýy kerek», dedi spıker.
Agrarlyq ǵylymı-bilim berý ortalyǵy tobynyń materıaldyq-tehnıkalyq bazasy 280 myń gektar bolatyn jer ýchaskesin, aýmaǵy 1 400 myń sharshy metr ǵımarattar men qurylystardy qamtıdy. 5 myń aýyl sharýashylyǵy tehnıkasy men avtokólik, 7 myńnan astam zerthanalyq jabdyqtary bar.
Ulttyq agrarlyq ǵylymı-bilim berý ortalyǵynyń qyzmeti ǵylymdy, bilimdi jáne óndiristi biriktirýge baǵyttalǵan. Qazaqstan organıkalyq ónim óndirý jáne eksporttaý boıynsha álemde jetekshi bolýdyń úlken áleýetine ıe. Ortalyq, mine, osy áleýetti ashý maqsatynda jumys isteýde.
Sondaı-aq basqarma tóraǵasy aýyl sharýashylyǵy mamandyǵynda oqıtyn jastardyń oqýlyǵy 70-80% memlekettik tilde daıyndalatynyn aıtty. «Men 1986 jyly Almaty aýyl sharýashylyǵy ınstıtýtyn bitirdim. Ol kezde bir topta 25 stýdent bolsa, jartysy aǵylshyn tilinde, jartysy qazaq tilinde oqıtyn, al jalpy leksııalar orys tilinde ótetin. Qazirgi ýaqytta dárister 70-80% ana tilimizde ótedi», deıdi ol.