Almaty qalasy fızıka-matematıka baǵytyndaǵy Nazarbaev Zııatkerlik mektebiniń oqýshysy Lıýbov Dýdchenko Dúnıejúzilik robottar olımpıadasynda III orynǵa taban tirep, qola medal júldegeri atandy. Ol taldyqorǵandyq zııatkerlermen bir qurama topta óner kórsetip, shyǵarmashylyq kategorııada baq synady. Halyqaralyq jarys 8-10 qarasha aralyǵynda Vengrııanyń Dıor qalasynda ótti.
«Fınalǵa jetý úshin aldymen qalalyq, sosyn respýblıkalyq, odan keıin quramaǵa ený kezeńderi bar. Osynyń barlyǵynan ótkennen keıin ǵana álemdik dodaǵa attana alasyń. Bul – úlken eńbek. Týra osy jarysqa men 8-shi synypta oqyp júrgenimde de qatystym. Biraq sońyna deıin jete almadym. Ol kezde komandamyz respýblıkalyq kezeńnen III oryn ıelengen bolatyn. Keıingi kezeńderge bul kórsetkishpen óte almadyq. Alaıda, bıyl óttik. Eki jyl buryn III orynǵa respýblıka boıynsha taban tiresek, bıyl álem boıynsha», dedi Lıýbov Dýdchenko.
L.Dýdchenkonyń aıtýynsha, komandalastarymen qurastyrǵan robot alǵashynda oıyndaǵydaı shyqpaı, biraz alańdatqan. Zııatker qyzdyń ýaıymyn jarystyń masshtaby, ondaǵy ártúrli elderden kelgen myqty básekelesteriniń bary eselendirse kerek. Halyqaralyq jarystyń aqtyq máresine álemniń 73 elinen 424 komanda qatysypty.
«Koreıa, Japonııa, Germanııadan kelgen neshe túrli myqty komandalar boldy. Shynymdy aıtsam, robotty qurastyrýǵa arnalǵan birinshi kúnniń sońynda qatty ýaıymdadyq. Sebebi, qurastyrý barysynda qıyndyqtar týyp, qolymyzdan keler me eken, eń bolmaǵanda úzdik ondyqqa ensek eken degen oıǵa da salyndyq. Biraq, ertesinde ózimizdi birden jınap alyp, qaıtadan iske kiristik. Marapttaý saltanatynda bizdi, elimizdi atap shaqyrǵandaǵy sát bárinen erekshe. Týymyzdy ustap alyp, sahnaǵa júgirip shyqtyq. Armanym – Qazaqstandy álemge áıgili etý. Aqyryndap oryndalyp jatqandaı», dedi ol.
Dúnıejúzilik robottar olımpıadasy – 2004 jyldan bastap 10-21 jas aralyǵyndaǵy oqýshylar men stýdentter arasynda ótkiziletin halyqaralyq jarys. Jyl saıyn Olımpıadaǵa 2000-nan astam daryndy balalar qatysady. Bıylǵy jarysqa «Aqyldy qalalar» taqyryby bekitilipti. Qatysýshylarǵa bolashaqtyń qalasyn qurýdaǵy jańa tujyrymdamalar, ıdeıalar men tehnologııalardy usyný mindettelgen.