Keshe Premer-Mınıstrdiń orynbasary Berdibek Saparbaev, Nur-Sultan qalasynyń ákimi Altaı Kólginov, Mádenıet jáne sport vıse-mınıstri Eldos Ramazanov Ulttyq Paralımpıadalyq oqý ortalyǵyna bardy.
Vıse-premer men qala basshysy Ulttyq Paralımpıada komıteti men Paralımpıadalyq jattyǵý ortalyǵynyń jumysymen tanysty. Olar ortalyqtyń jattyǵý zalyn, voleıbol, ústel tennısi, jekpe-jek alańdaryn aralap, sportshylardy jattyqtyrýǵa arnalǵan jańa qural-jabdyqtardy kórip shyqty.
Qazaqstandaǵy alǵashqy Paralımpıadalyq ortalyq – bul ulttyq quramalardy sapaly jáne kásibı daıarlaýǵa arnalǵan biregeı ǵımarat. Munda erekshe qajettilikteri bar adamdarǵa qajet barlyq nárse bar: sportpen shuǵyldanýǵa arnalǵan jabdyqtar, arnaıy sport zaldary, dárigerler, massajıster, pandýstar, úsh tilde (qazaq, orys jáne aǵylshyn) sálemdesý, taktıldi jabyn taqtaıshalary, kireberis esikterin avtomatty túrde ashatyn jáne jabatyn batyrma jáne basqalar.
Ortalyqta kúnine 780 adamǵa deıin sportpen tegin shuǵyldanýǵa múmkindik qarastyrylǵan.
Qazaqstandyq sportshylar búginge deıin alty jazǵy, jeti qysqy Paralımpııa oıyndaryna qatysqan. Qazirgi tańda Qazaqstan quramasynda eki altyn, bir kúmis júlde bar. 2016 jyly Brazılııa astanasy Rıo-de-Janeıro qalasynda ótken jazǵy Paralımpıadada 100 metrge erkin ádispen júzýde Zúlfııa Ǵabıdýllına chempıon atanyp, tarıhı altyn júldege qol jetkizgen edi. Iаǵnı el qorjynyna tuńǵysh medal salǵan bolatyn. 2018 jyly Phenchhandaǵy (Ońtústik Koreıa) Paralımpıadada shańǵyshy Aleksandr Kolıadın Qazaqstan quramasyna ekinshi altyn medaldy áperdi. Sondaı-aq Rıodaǵy jazǵy Paralımpıadada Raýshan Qoıshybaeva para paýerlıftıngten áıelder arasynda 67 kılo salmaq dárejesinde kúmis medal ıelengen-di.
Endi qazaqstandyq paralımpıadashylar 2020 jyly Japonııanyń bas shahary – Tokıoda ótetin jazǵy Paralımpıadaǵa daıyndalýda. 25 tamyz ben 6 qyrkúıek aralyǵynda ótetin dodada sportshylar sporttyń 22 túrinen baq synaıdy.
Qazirgi tańda el qorjynynda Tokıo Paralımpıadasyna eki joldama bar. Jaz mezgilinde elordada para paýerlıftıngten álem chempıonaty uıymdastyrylyp, Paralımpıada joldamasy taratylǵan bolatyn. Elimizde ótken álemdik synda otandastarymyz Davıd Degtıarev pen Raýshan Qoıshybaeva Tokıo Paralımpıadasyna joldama jeńip alǵan-dy.