Elimizde jastardyń kóshbasshylyq qabiletterin ushtaý, ony damytý jolynda birshama jumys atqarylyp jatyr. Ásirese, túrli úkimettik emes uıymdardyń buǵan qosyp jatqan úlesteri az emes. Máselen, elimizge óziniń áleýmettik-qoǵamdyq jobalarymen áıgili «KAZBRANDS» qoǵamdyq qory Aqparat jáne qoǵamdyq kelisim mınıstrliginiń qoldaýymen respýblıka boıynsha «Tálimger (mentorlyq) jobasyn» iske qosqany belgili.
Jobanyń maqsaty elimizdegi jas kóshbasshylar men belgili qoǵam, memleket belsendilerin jastar máselesine beıjaı qaramaı, olardyń qoǵammen baılanysyn arttyryp, qoldaý kórsetý bolyp otyr. Jalpy, tálimgerlik degenimiz ustazdyq etý, úıretý degendi bildiredi. Sonymen birge tájirıbeli maman nemese kásipker óziniń kásibı bilimi men sheberligin tıimdi ári tanymal ádis arqyly tájirıbesi az mamanǵa nemese shákirtine berýdi aıtady. Iаǵnı, keri baılanys arqyly ártúrli ádister men úırený modelderiniń is-qımyldary men olardy túzetý arqyly tálimgerdiń shákirtti úıretýi. Qazirgi tańda keıbir mekemeler men kompanııalarda joǵary tájirıbeli qyzmetker óziniń bilip-túıgenin jańadan kelgen qyzmetkerge úıretý arqyly onyń boıyna belgili bir ýaqytta óziniń isine degen senimdilik pen jaýaptylyqty mashyqtap, sol iske ıkemdeıdi. Bul, bir jaǵynan, tájirıbeli mamandardyń óziniń isin jastarǵa sabaqtastyqqa qaldyra otyryp, sol kompanııanyń ishki erejeleri men jınaqtalǵan bilimdi olardyń boıyna sińirip, qabiletin ashý.
Jalpy, tálimgerlik bul jeke, toptyq jáne ujymdyq bolyp bólinedi. Kóbine biz jeke tálimgerlikti kezdestiremiz, ıaǵnı bir ustaz-tálimger bir mamanǵa úıretedi. Buryndary toptyq jáne ujymdyq sırek kezdesse, qazirgi tańda osy toptyq jáne ujymdyq ta jeke tálimgerlikpen bir deńgeıde kele jatyr.
Osy oraıda «KAZBRANDS» qoǵamdyq qory atalǵan jaıttardy eskere otyryp, «О́ńirlerde jastardy yntalandyrý jumysyn júrgizý úshin mentorlardyń 4 tobyn baryp oqytýdy uıymdastyrý» atty jobasy aıasynda elimizge 80 tálimgerdi daıarlap shyǵardy. Olar arnaıy kýrstardan ótip, tálimgerlik sertıfıkattar tabystaldy. Qazirgi tańda respýblıkanyń barlyq óńirinde 14-29 jas aralyǵyndaǵy jastarmen kezdesýler, semınar-trenıngter, dóńgelek ústelder, tálimgerlik sabaqtaryn uıymdastyrýda. Qazirdiń ózinde joba aıasynda 560 jetistikke jetken mentı/shákirt bar. Olar qazirdiń ózinde kóptegen grant pen konkýrstarǵa qatysyp, júldeli oryndar ıelenýde. Osyndaı aýqymdy jastarmen jumystardyń birnesheýine toqtalar bolsaq, bıyl 17 qazanda tálimgerler Baıan Ahmetjanova men Nurlan Kúntýov Nur-Sultan qalasynda «O’Azamat» bıznes ortalyǵynda «Mentorlyq (Tálimgerlik): jastardyń múmkindikteri men bolashaǵy» atty taqyrypta jastarmen dóńgelek ústel ótkizdi. Dóńgelek ústeldiń maqsaty – jastar arasynda kóshbasshylyq qabiletterin damytý, patrıottyq tárbıe berý, bos ýaqytty tıimdi paıdalanýǵa úndeý.
Sonymen birge jas tálimger Serik Avgýmbaevtyń da eńbegin erekshe atap ótken jón. Qazirgi tańda onyń 7 shákirti bar. Olardyń bárimen jumys istep júr. Sonyń ishinde úsheýi grant ıegeri atandy, bireýi: «Atameken» baǵytymen «Jas kásipker» baǵdarlamasy boıynsha, al ekeýi elimizdiń Aqparat jáne qoǵamdyq damý mınıstrligi men Azamattyq bastamalardy qoldaý ortalyǵynyń qoǵamdyq jobany qoldaý baǵyty boıynsha «Jasa jobasy» grantyn jeńip aldy. Bul qarajatqa balalardyń oıyn klýbyn uıymdastyrýdy qolǵa alýda. Al ekinshi qarajatqa Aqmola oblysynyń Býrabaı aýylynda aýyl balalaryna aýlada jattyǵý (vorkaýt) úshin sport alańyn salýdy josparlap otyr.
Jetistikke jetken mentı/shákirtterdiń ishinde erekshe toqtalatyn qyzyljarlyq tálimger – Ekaterına Starostına. Ol Soltústik Qazaqstan oblysy máslıhatynyń jas depýtaty, «Qyzyljar – Adaldyq alańy» atty aımaqtyq jobanyń jetekshisi. Búginde ózinen keıingi jas tolqyn áriptesterine tálimgerlik ádisti úıretip keledi. Sonymen birge «Menterstvo kak klıých k ýspehý», «Koleso balansa», «Lıchnostnyı rost ı lıderskıe kachestva», «Navykı pýblıchnogo vystýplenııa» atty semınarlar ótkizip júr. О́ziniń tobyna 5 shákirtti alyp, jumys josparyn, aldaǵy maqsattar men nátıjelerdi aıqyndap jumys isteıdi. Sonyń biri – Sultan Jaqan atty jas shákirt. Bıyl zańger mamandyǵy boıynsha ýnıversıetti támamdaǵan. Sportpen aınalysady. Kıokýshınkaı-karate sporty boıynsha QR chempıony, Reseı chempıonatynda kúmis júldeger, Sıbır-Azııa týrnırinde qola júldeger atanǵan. Biraq onyń bul jobadaǵy maqsaty – grant alyp, óziniń jeke kásibin, ıaǵnı fıtnes-zalyn ashý. Sol maqsatqa jetý úshin óziniń jetekshisi Ekaterına Starostınamen motıvasııalyq baǵyttaǵy jobalarǵa daıyndyq jumystaryn júrgizýde. Aldaǵy ýaqytta onyń maqsaty da oryndalady dep senemiz.
Joba bastalǵaly ár óńirde tálimgerlik jumystar qarqyndy uıymdastyrylyp, ótýde. Árıne, joǵarydaǵy aıtylǵan mysaldar sekildi jaıttar kóptep kezdesedi. Tálimgerlik bul jastardyń bolashaǵyna qoldaý kórsetip, ózderiniń maqsattaryna jetýine jol ashý, sonymen birge jastardyń ártúrli granttar men baıqaýlarǵa qatysýlaryna qoldaý kórsetý. «KAZBRANDS» qoǵamdyq qorynyń da negizgi baǵyty osy. Sondyqtan da aldaǵy ýaqytta da kóptegen is-shara men kezdesýler, semınar-trenıngter ótkizý josparlanyp otyr.
Kemel RAHYMJAN,
ekonomıka ǵylymdarynyń magıstri