Qazaqstan men Belgııa ekonomıkalyq dıplomatııaǵa basa nazar aýdaryp, saıası saladaǵy jan-jaqty yntymaqtastyqty jáne halyqaralyq platformalardaǵy ózara is-áreketterdi kúsheıtýge nıetin bildirdi. Bul keshe ótken Qazaqstan-Belgııa saıası konsýltasııalarynyń negizgi taqyryby boldy.
Qazaqstan delegasııasyn Syrtqy ister mınıstriniń orynbasary Roman Vasılenko, al Belgııa delegasııasyn Syrtqy ister mınıstrligi Ekijaqty yntymaqtastyq dıreksııasynyń bas dırektory Anık Van Kalster basqarsa, dıplomattar saıası, ekonomıkalyq, mádenı jáne gýmanıtarlyq yntymaqtastyqtyń keń aýqymdy máselelerin, sondaı-aq halyqaralyq kún tártibin jan-jaqty talqylady.
Ekonomıkalyq dıplomatııa sheńberinde taraptar ósimniń oń dınamıkasyn rastady jáne energetıka, aýyl sharýashylyǵy, medısınalyq qaldyqtardy óńdeý jáne basqa da salalardaǵy tabysty ózara árekettesýdi atap ótti. Qazaqstanda «John Cockerill», «Carmeuse», «Orfit» jáne basqa da belgııalyq kompanııalarmen birlesken jobalar iske qosyldy. Belgııa – Qazaqstan ekonomıkasyndaǵy eń iri ınvestorlardyń biri. Atalǵan el kompanııalary Qazaqstanǵa 7 mlrd AQSh dollarynan astam tikeleı ınvestısııa saldy.
A.Van Kalster Vallonııanyń eksportqa jáne sheteldik ınvestısııalarǵa yqpaldasý «AWEX» agenttiginiń jáne Flandrııanyń Investısııalardy tartý jáne eksportqa yqpaldasý «FIT» agenttiginiń basshylyǵymen Belgııa kásiporyndarynyń Qazaqstanǵa qatysty eki jylda bir ret uıymdastyrylatyn iskerlik mıssııasynyń tıimdiligin erekshe atap ótti. Bizdiń elimizge jasaǵan ekonomıkalyq saparlardyń sátti tájirıbesin eskere otyryp, Belgııa tarapy osyndaı mıssııalardy jyl saıyn ótkizý máselesin qarastyrýda.
Qazaqstannyń ınvestısııalyq ahýalyn talqylaı otyryp, R.Vasılenko Premer-Mınıstrdiń tóraǵalyǵymen ótetin úılestirý keńesi, sheteldik ınvestısııalardy tartý men qoldaýdyń úsh deńgeıli júıesi, «Kazakh Invest» qyzmeti týraly aıtty. Qazaqstan delegasııasy «Astana» halyqaralyq qarjy ortalyǵynyń negizinde iskerlik baılanystardy damytý perspektıvalaryna erekshe nazar aýdardy.
Sonymen qatar ustanymdardy úılestirý jáne qazirgi zamannyń ózekti máselelerin sheshý úshin halyqaralyq jáne aımaqtyq uıymdar sheńberindegi ózara yqpaldastyqtyń máseleleri qarastyryldy. A.Van Kalster Qazaqstannyń BUU Qaýipsizdik Keńesiniń 2017-2018 jyldardaǵy turaqty emes múshesi retindegi mańyzdy rólin, halyqaralyq qaýipsizdikke qosqan zor úlesin atap ótti. 2019 jyldyń 1 qańtarynda Belgııa BUU Qaýipsizdik Keńesiniń turaqty emes múshesi retindegi mıssııasyna kiristi jáne 2020 jylǵy aqpanda Keńestiń tóraǵalyǵyna daıyndalýda.
Eýropalyq odaqpen yntymaqtastyq aıasynda taraptar Keńeıtilgen seriktestik pen yntymaqtastyq týraly kelisimniń kúshine enýiniń jáne 2019 jyldyń maýsym aıynda qabyldanǵan Eýropalyq odaqtyń Ortalyq Azııa boıynsha jańa strategııasyn is júzinde iske asyrýdyń mańyzdylyǵyn atap ótti.
Kezdesý qorytyndysy boıynsha taraptar Qazaqstan-Belgııa qatynastaryn barlyq salada odan ári sapaly damytý jáne keńeıtý úshin birlesken kúsh-jigerdi jumsaýǵa daıyn ekendikterin málimdedi.