*Mysal-mysqyl
Alda baıǵus-aı
Gúlderdiń nárin jınap, qanaty talyp, sharshaǵan Araǵa yzyńdap Masa jolyqty.
– Tyrbyńdaýmen kún ótkizgen baıǵus-aı, – dep músirkedi ol Arany. – Sonsha alysqa baryp, qanat taldyryp... Qorek tabýdyń jeńil ádisin meńgergen myna menen úırenbeısiń be, – dep, kóterile qalyqtap, Araǵa estirte yzyńdap baryp omartashynyń bilegine jabysa ketti.
... Kúrekteı alaqan ústinen sart ete qalǵanda til tartpaı ketken Masany aıaǵan Ara:
– Alda, baıǵus-aı! Kún kóristiń jeńil tásili jetti-aý, túbińe, – dep bal shelekke qaraı bet aldy.
Aıý men shoshqa
Aıý: « Bal shelek bolsa, shirkin».
Shoshqa: «Bal shelektiń keregi ne, aýnap-qýnap raqatqa batatyn batpaq bolmaǵan soń...»
Qı otyn men aǵash
Qı: «Osy seniń jeńiltektigiń-aı, tutansań boldy laýlap júrip beredi ekensiń».
Aǵash otyn: «Qońyrsyp, byqsyp – qolqany atqansha, janar bolsań laýlap janǵanǵa ne jetsin».
Porshen men shatýn
Porshen: «Motordan dybys shyqsa, moıyn-basyń bylqyldap júrip beredi ekensiń».
Shatýn: «Jalǵyz sılındirdiń yńǵaıyn tappaı joǵary-tómen zyrlap júrip, sen de bireýge kúlesiń-á!»
Júk máshınesi men esek arba
Júk máshınesi: «Qalaqtaı bolyp qalqıyp, mazýtqa jarymaǵan baıǵus-aı, shıqyldap mazany aldyń ǵoı».
Esek arba: « Mazýtqa jarymaǵan esh nárse emes-aý, bárinen de, tútinimen qolqany bitep, ózgeniń kózine topyraq shashqannan saqtasyn».
Et týraǵysh pen pyshaq
Et týraǵysh: «Jup-juqa bolyp alyp, seniń osy týra kesetiniń jaman eken?»
Pyshaq: « Aınaldyra myjyp, sólin aǵyzyp ezgennen de týra keskenge ne jetsin».
Tós pen shege
Tós: «Men qandaı salmaq bolsa da qalqıyp qarsy turam».
Shege: «Aýyr balǵany kórgende, tipti tasqa da bolsa kirip ketkim keledi».
Mysyq pen jylan
Mysyq: «Men qas jaýymdy kórsem – týra betin tyrnaımyn».
Jylan: «Kózge kórinip keregi ne! Jymyn bildirmeı jyljyp kep ýly tilińdi suǵyp almaısyń ba?».
Maǵrıpa JYLQYBAEVA