Megapolıstiń sporttyq ómirinde Almaty marafonynyń mánimen qosa, áleýmettik turǵyda atqaryp kele jatqan ilkimdi bastamalary bar. Dástúrge saı Almaty marafonyna qatysýshylardyń sórelik jarnasynan jınalǵan qarajattyń bir bóligi qaıyrymdylyq isterge jumsalady. Osy maqsatqa oraı, «Birinshi bolý – batyldyq» korporatıvtik qorymen aldaǵy 2020 jylǵa arnalǵan qaıyrymdylyq sharalarynyń tizbegi anyqtaldy.
Kelesi jyly Almaty marafony erekshe kútimdi qajet etetin balalarǵa arnalǵan 5 mekemege qaıyrymdylyq kómek kórsetedi. Iаǵnı, «Keńes» múgedekter qoǵamdyq birlestigine Áleýmettik beıimdeý jáne eńbekpen ońaltý ortalyǵy men balalarǵa arnap jabdyqtalǵan oıyn alańyn qurady. Esik qalasyndaǵy aqyl-esi kemis balalarǵa arnalǵan oblystyq mektep-ınternatqa fýtbol alańyn, «SOS Almaty balalar aýyly» memlekettik emes bilim berý mekemesine jattyǵý alańyn salady.
Damýynda erekshelikteri bar balalarmen jumys isteýge arnalǵan «Amalııa» reabılıtasııalyq ortalyǵyna sensorlyq ıntegrasııaǵa arnalǵan jabdyq satyp alady. Sondaı-aq Talǵar qalasyndaǵy «Nur» otbasylyq balalar úıine sport alańyn syılaıdy.
– Qorymyzdyń basty maqsaty – sportty barlyǵyna qoljetimdi etý. Sondyqtan jyl saıyn Almaty marafonynan keıin biz erekshe kútimdi qajet etetin balalarǵa arnap sport ınfraqurylymyn salamyz. Almaty marafony qurylǵaly beri 8 jyl ishinde jarysqa qatysatyn júgirýshilerdiń arqasynda 17 qaıyrymdylyq jobasy júzege asty. 2019 jyly úsh qaıyrymdylyq maqsatty oryndaý úshin 26 mıllıon teńge bólindi. 2020 jyly balalarǵa arnalǵan mekemege 35 mıllıon teńge kóleminde qaıyrymdylyq kómegin kórsetý josparlanǵan, – deıdi «Birinshi bolý – batyldyq» korporatıvtik qorynyń atqarýshy dırektory Saltanat Qazybaeva.
Esterińizge sala keteıik, «Almaty marafony-2020» 19 sáýirde ótedi. Oǵan álemniń túkpir-túkpirinen 18 myńdaı áýesqoı sportshy keledi dep kútilýde.