Respýblıkalyq «Rýhanı jańǵyrý», «Arhıv-2025» baǵdarlamalary, sonymen qatar Jastar jyly aıasynda jas arhıvshiler forýmy ótti. Forým keshendi sıpat alyp, onda sharalar túrli formada uıymdastyryldy.
Forým sheńberinde jas mamandar pikirtalasqa, taldaýǵa qatysty, arhıv isinen oqý-úıretý saǵattary men baıandama da jasaldy. Jastardyń basqosýyn ashqan oblystyq arhıv dırektory Baıbosyn Murzın sharanyń maqsaty jas býynnyń arhıv isine mashyqtanýyn qalyptastyrý, shyǵarmashylyq qarymyn damytý jáne arhıv isi mamandyǵyn tanyta túsý ekenin aıty.
«Arhıv isi kóz maıyn taýysatyn tózimdilikti, bilimdilikti qajet etedi. Ár jumystyń, ár mamandyqtyń qıyndyǵy bar. Jastar ony júrekpen qalaǵanda eshqandaı kedergi men qıyndyqty sezinbeıdi, óıtkeni eńbek bárin de jeńedi» dedi Baıbosyn Baıbatyruly. Oblystyq aqparattandyrý, memlekettik qyzmet kórsetý jáne arhıvter basqarmasy bastyǵynyń mindetin atqarýshy Saltanat Tashanova forýmnyń tek jastar emes, tájirıbeli mamandar úshin de mańyzy zor ekenin aıtty. Qazir bul salada da sıfrlandyrý úderisi júrip jatyr. Arhıv isi salasynda belsendi kásibı damyp kele jatqan jastar sońǵy jyldary mamandardyń 30 paıyzyn quraıtynyn tilge tıek etti. Oblystyq jastar isi basqarmasynyń basshysy Marat Jurqabaev Jastar jyly qoıylǵan maqsattar men olardyń júzege asýyna toqtaldy.
Forýmda jas arhıvshiler de óz oılarymen bólisti. Al forýmnyń ekinshi bóliginde oǵan qatysýshylar salanyń problemalary men jetistikterin, mamandar daıyndaý máselesin, óz tájirıbelerin ortaǵa saldy. Forýmǵa qatysqan «GAKO» memlekettik mekemesi aqparattyq tehnologııalar bóliminiń basshysy Elmıra Aǵajanova jastardy búgingi qaǵaz qujattardy óńdeıtin ınnovasııalyq baǵdarlamalardy alyp otyrǵan túrli elder men memleketterdegi elektrondyq arhıvtermen tanystyrdy.