Qyzyljar aýdandyq aýrýhanasynyń býhgalteri 20 mln teńge bıýdjet qarjysyn qaltasyna basyp, jeke maqsatyna paıdalanǵan.
Ekonomıkalyq tergeý departamenti tergeý barysynda aýrýhananyń esepshottarynan qarjynyń urlanǵanyn anyqtaǵan. Sóıtip, «Alaıaqtyq» baby boıynsha qylmystyq is qozǵalǵan.
«Tergeý amaldary kezinde 2016 jyldyń qańtary men 2018 jyldyń jeltoqsany aralyǵynda aýdandyq aýrýhananyń býhgalteri qyzmet babyn paıdalanyp, respýblıkalyq bıýdjetten túsken qarjyny óziniń jeke esepshotyna aýdaryp otyrǵan. Qomaqty qarajat kásiporynnyń qalypty jaǵdaıda jumys isteýine jáne qyzmetkerlerge eńbekaqy tóleý úshin bólingen bolatyn» deıdi departament ókilderi.
Úsh jyldyń ishinde aýdandyq aýrýhana býhgalteri 20,8 mln teńgeni jymqyrǵan. Sot kúdiktini aıypty dep taýyp, 3 jylǵa shartty túrde jaza kesti. Ol endi 5 jylǵa deıin materıaldyq jaýapkershiligi bar qyzmetterge ornalasa almaıdy.
Soltústik Qazaqstan oblysy