Májilis Tóraǵasy Nurlan Nyǵmatýlın Nur-Sultan qalasynyń ustazdar qaýymymen kezdesti. Onda búginde Májilis depýtattary jumysqa alǵan «Pedagog mártebesi týraly» zań jobasy áńgime ózegine aınaldy, dep habarlady Májilistiń baspasóz qyzmeti.
Elordalyq mektepte ótken kezdesýge ustazdar qaýymy, atalǵan zań jobasy boıynsha jumys tobynyń músheleri, quzyrly mınıstrliktiń ókilderi qatysty. Májilis Tóraǵasy óz sózinde:
– Elbasy Nursultan Nazarbaevtyń jáne Memleket basshysy Qasym-Jomart Toqaevtyń muǵalimder men oqýshylar júktemesin qysqartý, óz mindettemelerine kirmeıtin jumystan bosatý týraly basqa da tapsyrmalary bar. Birneshe aıdan beri zań jobasy Májilistiń barlyq komıtetterinde tııanaqty ári jan-jaqty qaralýda, – dedi.
Májilis Spıkeri atap ótkendeı, búginge deıin jumys tobynyń 21 otyrysy ótip, 100-den astam túzetýler qaralǵan. Degenmen, zań jobasyn búge-shigesine deıin tyńǵylyqty ázirleý úshin Parlament ókilderi osy kezdesýdi uıymdastyryp otyr.
Kezdesý barysynda Májilis Tóraǵasy ustazdardyń mindettemelerine kirmeıtin jumystardy oryndaýǵa májbúrleýden qorǵaý, negizsiz tekserýlerge tyıym salý syndy máselelerge basa nazar aýdardy.
Sondaı-aq muǵalimderdiń ataq-abyroıyn qorǵaýǵa da kóńil bólindi. Májilis Spıkeri normatıvtik oqý júktemesine toqtalyp, muǵalimder júktemesin qysqartýdy qaraǵan kezde, oqýshylardyń da aptalyq júktemesin azaıtýdy oılaný qajettiligine toqtaldy.
О́z kezeginde ustazdar qaýymy zań jobasynyń mańyzdy normalaryn talqylaýǵa zor qyzyǵýshylyq tanytty.
Kezdesý sońynda N. Nyǵmatýlın atalǵan zań jobasynyń barlyq talaptarǵa saı, sapaly bolýy úshin ustazdar tarapynan aıtylǵan barlyq usynys-pikirler jan-jaqty taldanyp, barynsha eskeriletinin atap ótti.
Pedagogtar mańyzdylyǵyn eskere otyryp, uıymdastyrylǵan kezdesý úshin óz rızashylyqtaryn bildirdi.