S.Báıishev atyndaǵy oblystyq ámbebap ǵylymı kitaphananyń «Kovorkıng» ortalyǵynda Qazaq álipbıin latyn grafıkasyna kóshirý jónindegi «Til-Qazyna» ulttyq ortalyǵynyń bas dırektory, Qazaqstannyń eńbek sińirgen qaıratkeri, Memlekettik syılyqtyń laýreaty, «Parasat» ordeniniń ıegeri, kóptegen prozalyq kitaptyń avtory, jazýshy Álibek Asqarovpen kezdesý ótti.
Aqtóbe oblysy tilderdi damytý basqarmasynyń Tilderdi oqytý ortalyǵynda «Memlekettik tildi meńgerýdiń úzdik tájirıbeleri» taqyrybynda respýblıkalyq semınar-trenıng ótkizgen jazýshy bos ýaqytyn paıdalanyp, kitaphana oqyrmandarymen kezdesti. Kitaphanaǵa arnaıy at basyn tirep kelýiniń óz sebebi bar. 2012 jyldary Astanadaǵy Ulttyq akademııalyq kitaphana, Almatydaǵy Ulttyq kitaphananyń bas dırektory qyzmetin atqardy. Júregine jaqyn kitaphananyń tynys-tirligimen tanysyp, sońǵy jyldary jazylǵan kitaptaryn kitaphananyń kitap qoryna syıǵa berdi. Kitapty jazar aldyndaǵy zertteýleri men jol shekken sapary jaıly áńgimeleri oqyrman qaýymdy ózimen birge alyp júrgendeı áserde qaldyrdy. Qalamgerdiń úzeńgiles dostary aqyn Meıirhan Aqdáýletov, Ertaı Ashyqbaev jazýshynyń ádebıetke qosqan qomaqty úlesi jaıly aıtyp, keshtiń kórkin asha tústi.
Shara barysynda abonementtik qamtamasyz etý bólimshesi «О́r Altaı, men qaıteıin bıigindi...» atty kitap kórmesin oqyrmandar nazaryna usyndy.
Jazýshynyń kitabyn oqyǵanmen ózin alǵash kórgen oqyrmandar qoltańba alyp qalýǵa asyqty. Kezdesýge kóńili tolǵan aǵamyz kitaphana ujymyna alǵysyn bildirdi.
Talǵat TILEÝLESOV