Búginde aýyl sharýashylyǵynda da bir belesten ekinshisine kóterile túsip kele jatqan azamattar barshylyq. Besqaraǵaı aýdanynyń basshylyǵy Marat Qalyqovtyń esimin sonyń biri ǵana emes, biregeıi retinde tilge tıek etip, osy azamattyń sharýasymen tanysýymyzdy ótingen edi.
Marattyń Steklıanka degen aýyldan sharýashylyq bazasyn satyp alyp, iske kirisip ketkenine bıyl tórtinshi jyl. О́zi negizi Kókpekti jaǵynyń azamaty. Sol jaqta et baǵytyndaǵy mal ósirýmen aınalysqan. Qazirde bul sharýasy da qosa júrip jatqan kórinedi. Iаǵnı atalǵan aýdannyń Tassaı aýylynda úsh júz bas iri qara bordaqyda tur.Endi myna jaqtaǵy sharýasyna keletin bolsaq, osydan tórt jyl buryn jergilikti sút baǵytyndaǵy júz sıyrdy satyp alyp, iske kirisip ketedi. Al keler jyly qaladan sút óńdeıtin shaǵyn sehty ashyp alady. Sút óndirýdiń paıdaly sharýa ekendigin ańǵarǵan soń ýaqytty sozbaı Reseıden sút baǵytyndaǵy eki júzden astam asyl tuqymdy sıyrdy satyp alady. Jergilikti sıyr kúnine uzasa on lıtr sút berse, al keıingi asyl tuqymdy sıyrdyń árqaısysynan 12-14 lıtrden sút alýda. Jáne munyń jergilikti sıyrlardan alynǵan sútpen salystyrǵanda maılylyǵy da óte joǵary. Solaısha mundaǵy «Qalıhanuly» sharýa qojalyǵy birer jyl ishinde qarqyn ala bastady. Qazirde Steklıankadaǵy sút fermasynda jıyny 24 kisi eńbek etedi. Bul jańadan ashylǵan sonsha jumys orny degen sóz. Munyń bárin qalaısha quptamasqa!Jáne Marat Qalıhanulynyń taǵy da kesheýildetpeı qaladan sút óńdeıtin shaǵyn sehty ashyp alǵany durys sharýa boldy. Bul sehta da jıyrmaǵa jýyq adam eńbek etedi. Olardyń ortasha aılyq jalaqysy qyryq pen elý myńnyń aralyǵynda. Sút sehynyń táýliktik qýaty 10 tonna. Ázirge bular alty tonna sút óńdep, odan jeti túrli ónim shyǵarýda. Munyń ishinde sútten basqa aıran, qaımaq, irimshik, syrǵa deıin bar. Olardy qaladaǵy qyryqtan astam túrli uıymdar men mekemelerge jóneltýde. Munyń syrtynda qalanyń úsh jerinde sút ónimderin satatyn óz pavılondary jumys istep tur.Osy oraıda mal sharýashylyǵyn damytýǵa qoldaý bildirip otyrǵan respýblıka Úkimeti men salalyq mınıstrlikke, oblystyq jáne aýdandyq ákimdikke de alǵysymyz sheksiz deıdi Marat baýyrymyz. Aıtsa aıtqandaı, bular tek ótken jyly memleket tarapynan 9 mıllıon teńge sýbsıdııa alypty. Ol da úlken kómek. Sonan soń, burynǵydaı emes, sharýamen aınalysamyn degenderge eshqandaı kedergi joq. Qaıta jergilikti bılik tarapynan qoldaý kóp.Bul solaı dese, aýdandaǵylar buǵan dán rıza. Bular ótken bir jylda aýdan bıýdjetine 6 mıllıon teńge kiris kirgizipti. Onyń syrtynda Marat aýdan ómirindegi barlyq sharaǵa zor belsendilikpen qatysyp kele jatqan kórinedi. Ásirese, onyń túrli qaıyrymdylyq sharalarynan syrt qalmaı otyrǵany qýantady. Aıtalyq, ol jetim balalar úıiniń bir túlegine óz qarjysyna úı satyp áperipti. Taǵy bir jetim balany jasy on segizge tolǵansha óz qamqorlyǵyna alypty. Oblys ákiminiń «Týǵan jerge taǵzym» aksııasyna oraı elge, qarttarǵa jasap otyrǵan qamqorlyǵy óz aldyna bir áńgime.Aýyldan shyqqan, eki óńirge de eńbegi sińip otyrǵan aýyl kásipkeriniń otbasy týraly da bir aýyz sóz aıta ketsek esh artyqtyǵy joq pa deımiz. Marat pen Tolqyn ekeýi tórt balany aıalap, durys tárbıelep keledi. Úlkenderi Tilek qalalyq ishki ister basqarmasynda, al kelinderi Elnýra qarjy polısııasynda qyzmet etýde. Al ekinshi uldary Álel qarjy kolledjinde oqyp jatyr. Áli degen uldary besinshi synypta oqysa, kenjeleri Aısha úsh jasta.Buǵan deıin túrli aýylsharýashylyq kórmelerinde top jaryp kele jatqan Marattyń alar asýy alda dep bilemiz.Shyǵys Qazaqstan oblysy,Besqaraǵaı aýdany.Dáýlet SEISENULY.Sýrette: Marat Qalyqov óziniń shaǵyn sút óńdeý sehynda.Sýretti túsirgen avtor.