Kezdesý barysynda jas kóshbasshylar Nursultan Nazarbaevqa ózderiniń jetistikteri men túrli salalardaǵy jańalyqtary týraly aıtyp berdi. Bul týraly elbasy.kz habarlady.
Adamı kapıtaldy damytýdyń mańyzdylyǵyn aıta kele, Qazaqstannyń Tuńǵysh Prezıdenti jahandyq damýdyń zamanaýı qaterleri men álemdik trendterine toqtaldy.
Sonymen birge, Nursultan Nazarbaev jastarǵa odan ári ósýge teń jaǵdaı jasaý úshin qolǵa alynyp jatqan sharalar týraly aıtty.
– Jastar jyly aıasynda talantty jáne qabiletti jas qazaqstandyqtardy qoldaýǵa baǵyttalǵan «El Ymiti» bastamasyn usyndym. Bul bastamany Tuńǵysh Prezıdent qory qolǵa alyp, memlekettik organdarmen tyǵyz baılanysta jumys istep jatyr. Qazir Qor aýqymdy transformasııa kezeńin ótkerýde. Qor bilim berý, áleýmettik damý jáne jastar bastamalaryn jan-jaqty qoldaý qurylymyna aınalady, - dedi Elbasy.
Áńgime barysynda Nursultan Nazarbaev «El Ymiti» bastamasy aıasynda aldaǵy atqarylatyn jumystardyń mańyzdy baǵyttaryna toqtaldy.
– Biz stýdentterdiń qabiletteri men kásibı baǵdaryn anyqtaıtyn keshendi júıe quramyz. 2020 jyly barlyq óńirlerde oqýshylardyń qabiletteri men kásiptik baǵdaryn erte anyqtaıtyn arnaıy ortalyqtar ashylady. Onda daryndy balalardyń qabiletin dıagnostıkalaýdyń úzdik álemdik tájirıbege negizdelgen zamanaýı ádisteri qoldanylatyn bolady, - dedi Qazaqstannyń Tuńǵysh Prezıdenti.
Sondaı-aq, Elbasy jaqyn arada elordada úzdik bilim berý resýrstaryna qoljetimdilikti qamtamasyz etetin bolashaq mamandyqtardyń ortalyǵy men arnaıy aqparattyq alań qurylatynyn aıtty.
Jıyn barysynda Nursultan Nazarbaev aýyl mektepterin qoldaý boıynsha josparlanǵan sharalarǵa toqtaldy. Máselen, Tuńǵysh Prezıdent Qory baǵdarlamasy aıasynda «Myń bala» olımpıadasy uıymdastyrylady. Nátıjesinde aýyl mektepterindegi 1000 úzdik oqýshy talantty balalarǵa arnalǵan «Daryn» mektepterinde bilimin jalǵastyrýǵa múmkindik alady.
Sonymen qatar, arnaýly baǵdarlama boıynsha aýyl mektepteriniń modernızasııasy júrgiziletin bolady. 2020 jyly birinshi kezeńde 14 mektep tańdalady.
– Baǵdarlama aıasynda osy mektepterdiń pedagogtary respýblıkalyq ıntellektýaldyq mektepter men jetekshi halyqaralyq ýnıversıtetterde oqytýdyń zamanaýı ádisterin meńgeredi, - dedi Qazaqstannyń Tuńǵysh Prezıdenti.
Elbasy jas kóshbasshylar tobyn qurý prosesine de erekshe nazar aýdardy.
– Biz kóshbasshylyq qasıetterdi damytý, sondaı-aq, óskeleń urpaqtyń boıynda patrıotızmdi kúsheıtý úshin arnaıy jobany qolǵa aldyq. Jastardy ózin-ózi damytýǵa jáne jetistikke jeteleıtin mundaı baǵdarlamalar álemde óte tanymal. Jańa baǵdarlamada 7 baǵyt qamtylady: fızıkalyq damý, tulǵalyq qasıetterdi damytý, kitap oqý, eriktilerdiń qyzmetine atsalysý, ekspedısııalar men saparlarǵa qatysý, ulttyq murany saqtaý jáne tájirıbe jınaý, - dedi Nursultan Nazarbaev.
Sonymen birge, Qazaqstannyń Tuńǵysh Prezıdenti ekonomıkanyń túrli salalarynda mamandar daıarlaýdyń mańyzdylyǵyn atap ótti.
– Basty talap – úzdik bilim men álemdik jetekshi kompanııalarda jıǵan tájirıbe ǵana emes, sondaı-aq, topta jumys isteý, kúrdeli mindetterge jaýapkershilikpen qaraý jáne jumysty sońyna deıin jetkizý sheberligi. Baǵdarlama boıynsha irikteýden ótken ár maman ózgeristerdi basqarý menedjeri deńgeıine deıin oqytylady - dedi Elbasy.
Sóz sońynda Nursultan Nazarbaev barsha qazaqstandyqtardy «El Úmiti» bastamasyn iske asyrýǵa belsene qatysýǵa shaqyrdy.
– Bul bastamaǵa búkil qoǵam, ásirese, aǵa býyn bir kisideı atsalyssa, nátıjeli bolatynyna senimdimin. Ustazdar qaýymy men shyǵarmashylyq ıntellıgensııany osy jobalardy qoldaýǵa shaqyramyn, - dedi Qazaqstannyń Tuńǵysh Prezıdenti.