«Dıalog. Senim. Bolashaqqa nyq qadam». Dál osyndaı ataýmen Qazaqstannyń Tuńǵysh Prezıdenti kúnine oraı Túrkistanda tuńǵysh ret jastar forýmy ótkizildi. Bul quryltaı jastardyń bıznes, óner jáne tehnologııa salasynda ózderin tolǵandyratyn máseleler boıynsha pikir almasýǵa múmkindik beretin alań. Sondaı-aq jas belsendiler shahar ákimi Rashıd Aıýpovpen ashyq áńgimelesip, qalany damytýǵa qatysty oılarymen bólisti.
Forýmnyń negizgi mıssııasy ıdeıalar, jastardyń qulshynysyn oıatý jáne qalany kórkeıtý. Uıymdastyrýshylar atalǵan basqosýdyń jastar men stýdentterdiń jyl saıyn bas qosyp, qala jastarynyń belsendiligin arttyratyn jáne shahardyń ósip-órkendeýine úles qosatyn paıdaly sharaǵa aınalatynyna senimdi. Mundaǵy maqsat – jaqyn aımaqtardan jáne jergilikti jastar uıymdary, qaýymdastyqtar, sol sekildi jeke kásipkerlerdiń basyn qosyp, olarmen tájirıbe bólisý arqyly jastardyń tyń ıdeıalaryn júzege asyrýǵa septesý.
Qala ákimi Rashıd Aıýpov jastardy qalany damytýǵa belsendi qatysýǵa shaqyryp, týrızm jáne servıstik qyzmet kórsetý salasyndaǵy bıznes ıdeıalardy damytýdy usyndy.
– Bıyl Túrkistanǵa 1 mln 200 myń týrıst keldi. Qalany jańǵyrtsaq, bul aǵyn jylyna 4 mıllıonǵa deıin artady. Túrkistan – qoǵamdyq tamaqtaný, qonaqúı qyzmetteri, biregeı qolóner taýarlary salasyndaǵy bıznesti damytýǵa qolaıly aımaq, – dedi Rashıd Aıýpov.
Sondaı-aq ákimniń aıtýynsha, Túrkistanda qalalyq akselerator ashylady. Munda jastardyń kreatıvti jobalaryna qarjylaı qoldaý kórsetilmek.
Jastar quryltaıynda bıznesti tıimdi júrgizýdiń joly, súıikti isten paıda tabý, kásipti neden bastaý kerek, franshıza, ınvestısııa tartýdyń tyń amaldary, kraýdfandıng arqyly 15 myń dollar jınaý syndy máseleler boıynsha salanyń úzdikteri óz tájirıbelerimen bólisti. Atap aıtqanda, belgili bloger Janserik Qadyrbaev, StudyON lıngvıstıkalyq mektebiniń negizin qalaǵan Shahnoza Nyshanqulova, jas rejısser jáne jazýshy Aıdıe Aıdarbekov tabysqa jetýdiń syryn aıtyp berdi.