Kópbalaly analardy qoldaýdyń jarqyn úlgisi Almaty oblysynyń Kóksý aýdanynda da júrip jatyr. Jyl basynan beri aımaqta turatyn 19 áýletke baspana berilgen.
Qonys toıyn óz shańyraǵynda atap ótken ana men bala bul qýanyshqa memlekettik baǵdarlamalar men mesenattardyń kómegin arqyly qol jetkizdi. Búginge deıin aýdan ortalyǵy Balpyq bı aýylynan 10 otbasy, Muqanshy aýyldyq okrýginen 3 áýlet, Jarlyózek jáne Eńbekshi aýyldarynan eki-eki otbasydan baspanaly bolsa, Musabek, Alǵabas aýyldyq okrýgterinen de bir-bir áýlet úı alǵan.
-Jaqyn kúnderi Balpyq bı aýylynda «Nurly jer» baǵdarlamasymen salynyp jatqan 50 páterlik úı paıdalanýǵa beriledi. Bul - kópqabatty jalgerlik úıdiń quny 456,9 mln teńge. Osy úıden kezekte turǵan kóp balaly otbasylarǵa da páter beremiz. Qazir aýdan boıynsha 141 kópbalaly otbasy turǵyn úıge muqtaj. Bolashaqta másele sheshimin tabady, deıdi Kóksý aýdanynyń ákimi Almas Ádil.