Keshe «Qyzylorda – Qumkól» tasjolynda jolaýshylar avtobýsy aýdarylyp, oqıǵa saldarynan 8 adam qaza taýyp, 21 adam aýrýhanaǵa jatqyzyldy. О́ńirlik kommýnıkasııalar ortalyǵynda ótken brıfıngte mamandar oqıǵanyń jaı-japsaryn aıtyp, jýrnalıster saýaldaryna jaýap berdi.
Oblystyq polısııa departamentiniń bastyǵy, polısııa polkovnıgi Bektóre Sultannyń aıtýynsha, «South Oil» seriktestiginiń jumysshylary otyrǵan avtobýs Qumkól kenishinen túnde shyǵyp, Shymkent qalasyna qaraı baǵyt alǵan. Olardyń apatqa ushyraǵandyǵy jaıly habar oblystyq tótenshe jaǵdaılar departamentiniń «112» qutqarý qyzmetine tańǵy saǵat 4:25-te túsken. Departament basshysy joldaǵy kóktaıǵaq saldarynan aýdarylǵan kóliktegi 36 adamǵa kómek kórsetýge tıisti sala mamandarynyń jedel jetkenin atap ótti. Qazir jol apatyna baılanysty qylmystyq is qozǵalǵan.
– Qazir avtobýsta bolǵan azamattardyń jeke bastaryna qatysty málimetter anyqtalýda. Bul oqıǵa boıynsha Qylmystyq kodekstiń 345-babynyń 4-bóligi boıynsha tergeý amaldary bastalyp, tıisti saraptama taǵaıyndaldy, – dedi B.Sultan.
Oblystyq densaýlyq saqtaý basqarmasy basshysynyń orynbasary Oljas Ysqaqovtyń aıtýynsha, zardap shekkenderge alǵashqy kómekti oqıǵa ornyna 7 jedel járdem kóligimen jetken dárigerler kórsetken.
Jaraqat alǵan 21 adam oblystyq medısına ortalyǵy men qalalyq aýrýhanaǵa jatqyzyldy. Aýyr jaraqattanǵan 6 adam jansaqtaý bólimine jetkizilipti. Avtobýsta bolǵan jolaýshylardyń 16-sy ortasha deńgeıde, 7-eýi jeńil-jelpi jaraqattanǵan. Olarǵa respýblıkalyq shuǵyl medısınalyq kómek ortalyǵy tarapynan da qoldaý kórsetilýde.
Qyzylorda oblysy