Elordada Nur Otan partııasyna saltanatty qabyldaý ótti. Jetekshi partııanyń qatary jas jáne belsendi azamattarmen tolyqty.
Partııa bıletin saltanatty jaǵdaıda tabys etken Nur Otan partııasy Tóraǵasynyń birinshi orynbasary Baýyrjan Baıbek Elbasynyń táýelsiz elimizdiń qalyptasýy men damýyna sińirgen eńbegi zor ekenin atap ótti.
– Nur Otan – Qazaqstannyń ósip-órkendeýi jolynda aıanbaı eńbek etetin jandardyń jumylǵan jeri. Bizdiń basty baılyǵymyz – táýelsizdik. Nur Otan partııasynyń mindeti – Elbasynyń memlekettik baǵytynyń sabaqtastyǵyn qamtamasyz etý. Bul bizge eń aldymen eldegi tynyshtyq pen tatýlyqty saqtap, adamdardy alalamaıtyn memlekette ómir súrý úshin qajet. Turaqtylyq joq jerde ósip-órkendeý de bolmaıdy. О́zderińiz Nur Otan partııasynyń qataryna qosylýǵa sheshim qabyldaǵan ekensizder. Qatarymyzǵa qosh keldińizder! Búginde bizdiń qatarymyz 900 myńǵa jýyq adamdy qurap otyr. Olar túrli ulys ókilderi men túrli kózqarastaǵy, qalalar men shalǵaı aýyldarda turatyn azamattar. Biz barlyǵymyz Elbasynyń jaqtastary jáne úlken bir otbasymyz, – dedi Nur Otan partııasy Tóraǵasynyń birinshi orynbasary.
«Men Almatydan Nur-Sultanǵa bet alǵan ushaqta edim, qasymda satıra akteri, telejúrgizýshi Tursynbek Qabatov otyrdy. Bir jarym saǵat boıy men oǵan partııa týraly, Elbasy men Memleket basshysynyń bastamalary men partııany qaıta jandandyrý aıasynda atqarylyp jatqan jumys barysy týraly áńgimeledim. Biz ushaqtan túsken kezde ol osynaý atqarylyp jatqan jumystarǵa óziniń de atsalysqysy keletinin aıtty», dedi B.Baıbek.
T.Qabatov pen kásipqoı boksshy M.Nursultanov ózderiniń partııa qatarynda júrip, el úshin qyzmet atqarýdy úlken baqyt sanaıtynyn jetkizdi.
Nur Otan partııasynyń qataryna Asqar Ábdiqalyq ta qosyldy. 19 jastaǵy Asqar Ábdiqalyqty buǵan deıin Memleket basshysy Qasym-Jomart Toqaev Arys qalasynda oryn alǵan jarylys kezinde 80 balany kólikpen qala syrtyna aman alyp shyqqany úshin «Erligi úshin» medalimen marapattaǵan edi.
Sonymen qatar Baýyrjan Baıbek «Qasıetti jol» qaıyrymdylyq qory qamqorshylyq keńesiniń múshesi Dıana Erlanǵa, Petropavldan kelgen jas kásipker Janat Qıqymovqa, «Otyrar TV» medıa-holdınginiń dırektory Áıgerim Jumaqulovaǵa jáne «My ız Shahtınska» volonterlar birlestiginiń múshesi Iýlııa Golovınaǵa partııa bıletin tapsyrdy.
Jalpy, elimiz boıynsha Nur Otan partııasynyń qataryna 2 myńǵa jýyq qazaqstandyq múshe boldy.