Qyzylordada HI «Baikonyr Invest» halyqaralyq ınvestısııalyq forýmy ótti. «Qyzylorda: turaqty órleý, ınvestısııalyq yntymaqtastyqtyqtyń jańa múmkindikteri» atty forým aıasynda jalpy quny 100 mlrd teńgege jýyqtaıtyn jobalardy júzege asyrý úshin 25 memorandým men 1 kelisimshartqa qol qoıyldy.
Jyl saıyn turaqty ótip turatyn dástúrli forým ınvestısııalyq jobalar kórmesinen bastaldy. Elimiz ben shetelden kelgen kásipkerler, ınvestısııalyq kompanııa jetekshileri, ǵylymı-zertteý ınstıtýttary ókilderi kórmede osy baǵyttaǵy oblys múmkindigimen tanysty.
Oblys ákimi Qýanyshbek Ysqaqov forýmnyń oblys ekonomıkasyna tıgizgen paıdasy jaıly aıtyp ótti.
– Osyǵan deıingi ótken forýmdarda 130-dan astam memorandýmǵa qol qoıylyp, oblys ekonomıkasyna 1 trln teńgeden astam ınvestısııa tartyldy. Al ótken jylǵy forým «jasyl ekonomıka» taqyrybyna arnalyp, jańǵyrmaly energııa kózderi, ınvestısııalyq jobalardy damytý jáne «jasyl tehnologııalardy» engizý salasyndaǵy yntymaqtastyq máseleleri talqylandy. Sonyń nátıjesinde qazir Jalaǵash jáne Shıeli aýdandarynda kún-elektr stansalary salynýda, – dedi oblys basshysy.
Qyzylorda oblysy tıimdi logıstıkalyq jaǵdaıǵa ıe óńirdiń biri. Syrdarııa ózeni búkil oblysty kókteı ótip jatyr, temirjol jáne «Batys Eýropa – Batys Qytaı» halyqaralyq magıstraliniń 800 shaqyrymnan astam bóligi osy óńir aýmaǵymen ótedi. Investorlar úshin keregi de osy.
«Talap» qoldanbaly zertteýler ortalyǵynyń dırektory Raqym Oshaqbaev moderatorlyq etken forýmda sheteldik dıplomatııalyq korpýs ókilderi, kásipkerler, ınvestısııalyq kompanııalar basshylary da pikirlerin bildirdi. Iran Islam Respýblıkasynyń Qazaqstandaǵy Tótenshe jáne ókiletti elshisi Madjıd Samadzade Saber eki el arasyndaǵy ekonomıkalyq baılanystarǵa toqtaldy. Sońǵy jyldary Irannyń Gúlistan, Mazenderan aımaqtarymen Qazaqstannyń ońtústik óńirleri arasynda barys-kelis, alys-beris ulǵaıǵanyn atap ótti.
Nıderlandy Koroldiginiń Tótenshe jáne ókiletti elshisi Andre Karstens «Shell» kompanııasy ekonomıkalyq baılanystyń negizine aınalǵanyn aıtty. Munaı-gaz salasynan bólek aýyl sharýashylyǵy ónimderin eksporttaýdan aldyńǵy qatarly memleket sanalatyn Nıderlandy ınvestısııasymen Aqtóbede iri jylyjaı kesheni salyndy. Sondaı keshenniń birin alda Qyzylordada salý josparlanýda.
Qazaqstandaǵy Koreıa Respýblıkasynyń elshisi Kım De Sık Koreıa men bizdiń el arasyndaǵy «Samal jel» atty ekonomıkalyq yntymaqtastyq baǵdarlamasy jaıly aıtty. Kólik jáne logıstıka, qurylys, ónerkásip, ınfraqurylymdy damytý, taý-ken metallýrgııa jáne jer qoınaýyn paıdalaný, saýda-ekonomıkalyq yntymaqtastyq, energetıka, ınnovasııa, aýyl sharýashylyǵy, qarjy, densaýlyq saqtaý men mádenıet, týrızm jáne bilim berý salalaryn qamtıtyn baǵdarlama sheńberinde Syr óńirinde aýrýhana salý josparda bar.
Budan bólek Fransııa, Germanııa, Makedonııa, Kanada, Slovenııa, QHR, Reseı Federasııasy ınvestorlary qatysqan forýmda oblystyń ár saladaǵy múmkindigi sarapqa salynyp, oblys, qala ákimdikteri men ınvestorlar arasynda birqatar memorandýmǵa qol qoıyldy.
Bılik pen bıznestiń arasyndaǵy dıalog alańyna aınalǵan forýmda Baıqońyr arnaıy ekonomıkalyq aımaǵyn qurý, aýyl sharýashylyǵynda fermerlikti jáne mal sharýashylyǵy klasterin damytý, memleket-jekemenshik áriptestikti damytý perspektıvalary talqylandy.
QYZYLORDA