«Otandastar» qorynyń bastamasymen ári qoldaýymen «Qazaq álemi», «Mır kazahov» kitaptarynyń tusaýkeseri ótti.
О́mirbaıandyq sıkldiń alǵashqy eki kitabyna shetelde turatyn 50 qazaqtyń oqıǵasy áńgimelengen. Ǵalymdar, bıznesmender, sportshylar, ártister men kompanııa jetekshileri – olardyń árqaısysynyń óz tarıhy bar.
Keıipkerler óz ómirleri, tańdaǵan joly men bolashaqqa josparlary týraly áńgimeleıdi.
«Osy kitap arqyly biz qazaq degen ulttyń birtutas, myzǵymaıtyn myqty ári asa qabiletti halyq ekenin, qaı eldi, qaı jerdi meken etse de, ulttyq bolmysyn, túp tamyryn joǵaltpaıtynyna otandastarymyzdyń nazaryn aýdarǵymyz keldi. Sondaı-aq qazaqtardyń álemdik qaýymdastyqtaǵy ózindik biregeı ornyna, qonaqjaılylyq, keńpeıildilik, úlkenge qurmet, kishige izet syndy qundylyqtaryn álemge óz salt-dástúri, mýzykasy men kórkemóneri, minez-qulqy arqyly tanytyp kele jatqanyna keńirek toqtalyp, kóbirek kóńil bólýdi maqsat ettik»,- dedi uıymdastyrýshylar.
Bul kitaptyń belgili bir avtory joq, kitapta keıipkerleriniń ózderi aıtqan oqıǵalarlynyń toptamasy jınaqtalǵan. Qazir qazaq tilinde «Qazaq álemi» dep atalǵan eki kitap jáne orys tilinde «Mır kazahov» atymen eki kitap baspadan shyqty. Birinshi kitapta 24 etnıkalyq qazaqtyń ómirbaıany toptastyrylǵan. Ekinshi kitapqa 26 jas keıipkerdiń ómir tarıhy qamtyldy.
Oqyrman týǵan-týystarynan, dostarynan alys, óz Otanynan jyraqta ómir súretin qazaqtardyń tarıhymen tanys bolady.
Qurastyrýshylardyń aıtýynsha, kitapqa dál osy adamdar ádeıilep tańdap alynbaǵan. Bul elý keıipker – qazaq halqynyń ulylyǵyn kórsetýdi, kez kelgen elde, kez kelgen jerde qazaq degen atty maqtanyshpen alyp júrýge, qaıda da bolsa, óz joldaryn tabýǵa, bul ómirde kirpish bolyp qalanýǵa bolatynyn árqaısymyzdyń sanamyzǵa jetkizýdi maqsat tutqan «Otandastar» qorynyń bastamasyna alǵashqy bolyp ún qosqandar.
Birinshi kitapta qamal buzar qyryq jastan asyp, qatarlastary men izinen ergen jas býynǵa eńbekqorlyq pen adamdyqtyń úlgisi bolyp júrgen qandastarymyz týraly aıtylady. Ekinshi kitapqa jasy qyryqqa jetpegen jastar toptastyrylǵan.