Atyraý oblysy Qurmanǵazy aýdanynyń Azǵyr óńiriniń 8 myńdaı turǵyny joǵary jyldamdyqty ınternetke qol jetkizedi dep habarlaıdy Atyraý oblysy О́ńirlik kommýnıkasııalar qyzmeti.
Aımaqtaǵy shalǵaı eldi mekenderdi damytýǵa erekshe mańyz berilýde. Bul týraly oblys ákimi Nurlan Noǵaev Ortalyq kommýnıkasııalar qyzmetinde ótken baspasóz máslıhatynda málimdedi. Qazirgi ýaqytta Reseı Federasııasymen shekaralas aımaqta ornalasqan Azǵyr aýylyna jalpy uzyndyǵy 377 shaqyrym gaz qubyry tartyldy. Sonymen birge shekara mańyna jaqyn ornalasqan keıbir eldi mekender elektr qýatyn Reseıden alyp otyrýy sebepti jańa elektr jelilerin júrgizýdiń jobalyq-smetalyq qujattamasy jasaqtalýda. Jaqyn arada ınternet jelisi júrgiziledi.
Sıfrlandyrý engizilýiniń arqasynda 10 aýyldaǵy ómir deńgeıi aıtarlyqtaı joǵarylap, áleýmettik qyzmetterge qoljetimdilik arta túspek. Atyraý jergilikti jeliler tehnıkalyq torabynyń dırektory Nurlan Maqulovtyń aıtýynsha, qazirgi ýaqytta atalǵan baǵytta 160 shaqyrym optıkalyq-talshyqty kabel tartyldy.
- Optıkalyq-talshyqty jeli Batys Qazaqstan oblysynyń Bókeı orda aýdanynan tartylyp jatyr. Onyń jalpy uzyndyǵy 185 shaqyrym. Internetke qoljetimdilik jyldamdyǵy sekýndyna 8 megabıtke deıin jetetin bolady. Jyl sońyna deıin ınternetpen 5 eldi meken tolyqtaı qamtylady. Bul oraıda, jalpy jumys aýqymy eki kezeńge bólingenin atap ótý kerek. Joba tolyqtaı 2020 jyldyń naýryz aıynda aıaqtalady, - dedi Nurlan Maqulov.
ATYRAÝ