Almatydaǵy Qazaqstan Respýblıkasynyń memlekettik táýelsizdigi jarııalanǵan tarıhı ǵımaratta 6 jeltoqsan kúni «Qazaqstan táýelsizdik jolynda» degen taqyrypta jastarmen kezdesý ótti.
Kezdesýge belgili qoǵam qaıratkeri, T.Júrgenov atyndaǵy Qazaq ulttyq óner akademııasynyń professory, jazýshy, dramatýrg, Qazaqstannyń eńbek sińirgen qaıratkeri Sultanáli Balǵabaev keldi. Stýdenter táýelsizdigimiz ben ulttyq qundylyqtarymyz jaıyndaǵy ulaǵatty áńgimelerge qanyqty.
Bul sharaǵa Almaty qalasynyń Qoǵamdyq damý basqarmasynyń tapsyrysy boıynsha «Zaman» parasatty jáne salaýatty ómir» qoǵamdyq qory uıytqy boldy.
Atalmysh qordyń dırektory Tileýbek Dórbethanuly qazirgi tańda Qazaqstan-Brıtan tehnıkalyq ýnıversıteti ornalasqan bul ǵımarattyń kezdesý orny retinde kezdeısoq tańdap alynbaǵanyn atady. Sondaı-aq táýelsizdik jarııalanǵannan keıin ómirge kelgen qoǵamdyq uıymdardyń biri sanalatyn Dúnıejúzi qazaqtary qaýymdastyǵynyń negizin qalaýshylardyń biri jáne onda 1992-2017 jyldary qaýymdastyq tóraǵasynyń orynbasary bolyp qyzmet atqarǵan Sultanáli Bazarbaıulyn kezdesýge kelgen stýdentter qaýymyna tanystyryp, sol kezdegi tarıhı oqıǵalardy baıandap berý úshin sóz tizginin qonaqtyń ózine tapsyrdy.
–Táýelsizdik jemisin búgin sizder kórip otyrsyzdar. Egemendik almasaq, bolmaǵanda munda otyrmaıtyn edińizder. Bul Qazaqstan kommýnıstik partııasy ortalyq komıtetiniń úıi bolǵan. Stýdent turmaq, aýdan, oblys basshylarynyń ózi zorǵa kiretin. Munda kóp jyldar boıy Dinmuhamed Konaev otyrdy. Eldiń qalyptasýy men damýyndaǵy úlken máseleler sheshilgen jer. Táýelsizdiktiń eń úlken jemisi senderdiń joǵary oqý oryndarynda qazaqsha oqyp jatqandaryń. Oǵan deıin joǵary oqý oryndarynyń 80-90 paıyzy oryssha oqytatyn. Qazir olardyń 70-80 paıyzy qazaq bólimderinde oqıdy. Al endi ózimniń jumysyma oralsam táýelsizdiktiń eń alǵashqy jetistikteriniń biri – sheteldegi qazaqtardy jınaǵany. Oǵan deıin Qazaqstandaǵy halyqtyń 37 paıyzy ǵana qazaq bolǵan. Qazir 70 paıyz boldy, – dedi S.Balǵabaev.
Sultanáli Bazarbaıulynyń aıtýynsha, Qazaqstan táýelsizdiginiń negizin qalaýshy qaıratker retinde Tuńǵysh Prezıdenttiń aıryqsha kóńil bóletin 2-3 nársesi bar. «Onyń birinshisi sheteldegi qazaqtardy jınaý. Ony táýelsizdikten keıin birden qolǵa alyndy. Alǵashqy quryltaıdy ótkizdi. Sonyń nátıjesinde 1 mln qazaq elge oraldy. Olar ósimimen 2 mln boldy. Eger olar bolmaǵanda respýblıka halqynyń sany 16 mln ǵana adam bolatyn edi. Mundaı jumysty kórshi elderdiń eshqaısy qolǵa alǵan joq. Máselen, 6-7 mln ózbek shetelde turady. О́zbekstan áli kúnge deıin birde-birin resmı túrde ákelgen joq. Al Qyrǵyzstan Aýǵanstannyń Pamır degen jerinde júrgen 2 myń qyrǵyzdyń ózin áli ákele almaı júr. N.Nazarbaevtyń ekinshi jasaǵan isi astanany kóshirýi boldy. Bir kezde kósheden qazaqsha sóıletin adamdy tabýdyń ózi muń bop ketken bul qala turǵyndarynyń 79 paıyzyn qazaqtar quraıdy. Úshinshisi, Túrkistannyń mártebesin kóterip, oblys ortalǵyna aınaldyrǵany».
Jalpy mádenıet pen rýhanııattyń ózekti máseleleri talqylanǵan bul kezdesý pikirtalmasý túrinde jalǵasyp, stýdentter ózderin tolǵandyryp júrgen jaǵdaılar boıynsha suraqtaryna jaýap alýǵa tyrysty. Táýelsizidik taǵylymyna qatysty oı kókjıekterin keńeıtip, sharadan soń estelik sýretke túsip, úlken ásermen tarqady.