Jezqazǵan qalasyndaǵy №10 orta mekteptiń bes oqýshysy tamaqtan ýlandy degen kúdikpen aýrýhanaǵa tústi. Abyroı bolǵanda, dárigerler der kezinde olardyń asqazanyn tazalap, densaýlyqtaryn qalpyna keltire aldy. Búgingi kúnde balalar úılerine aman-esen qaıtarylǵan.
Qazirgi ýaqytta atalǵan mektepte quramyna taýarlar men kórsetiletin qyzmetterdiń sapasy men qaýipsizdigin baqylaý basqarmasynyń mamandary engen arnaıy komıssııa jumys istep jatyr.
Al qalalyq ákimdiktiń qyzmetkerleri jappaı ýlaný oqıǵasyna mektep ashanasyn tikeleı kinálaýdyń áli erte ekenin eskertti.
«Mektep boıynsha 99 oqýshy ystyq tamaqpen qamtamasyz etiledi. Ýlanyp, aýrýhanaǵa túsken bes balanyń ekeýi mektep ashanasynda tamaqtanbaǵan», degen málimdeme taratty olar.
Al balalardyń ata-analary bul oqıǵanyń aq-qarasyn anyqtap, kinálilerge shara qoldanýdy talap etip otyr.
«Komısııa áli jumys istep jatyr. Oqıǵanyń ne sebepten bolǵanyn eshkim tap basyp aıta almaıdy. Eger ýlaný oqıǵasy men ashana arasynda baılanys bolmasa, onda nege bes birdeı bala aýrýhanaǵa túsedi?», deıdi balalarynyń bolashaǵyna alańdaǵan olar.
Eske salsaq, osydan eki kún buryn Jezqazǵan qalasyndaǵy basqa bir mekteptiń segiz jastaǵy oqýshysy ýlanyp, kóp uzamaı kóz jumǵan bolatyn.
Qaraǵandy oblysy