Qazirgi kezde qazaqstandyq qoǵamda dárigerlerdiń reıtingin qalaı qalyptastyrý qajettigi jóninde ár túrli oı-pikirler óristep júr. Qalaı degende de bul másele densaýlyq saqshylarynyń qyzmetine tıisti baǵa berý arqyly anyqtalatyny anyq.
Osy oraıda Aqtóbede onyń búgingi zamanaýı tásili júzege asyrylyp óńirdegi barlyq medısınalyq mekemelerge arnaıy maqsattaǵy QR kodtar ornatyldy. Osy arqyly turǵynar kodty smartfonmen skanerlep medısınalyq uıymnyń qyzmet kórsetý deńgeıi men sapasyn baǵalaı alady. Sonymen birge bul jóninde óz oı-pikirin jazyp nemese aýyzsha aıtyp qaldyrýyna da bolady.
Tyń baǵalaý tásili medısınalyq mekemeler úshin jańa sapa standarttaryn engizýge múmkindik týǵyzady. Sondaı-aq turǵyndardyń talap-tilekteri men suranystar jan-jaqty zerdeleýge de jol ashylady. Eń bastysy QR kodtar ornatý arqyly jaılylyq deńgeıin kóterip joǵaryda aıtylǵandaı memlekettik medısınalyq mekemelerdiń qyzmet kórsetý sapasyn odan ári jetildirý kózdelgen. Bul jóninde gazet tilshisine «Mindetti áleýmettik medısınalyq saqtandyrý qory» oblystyq fılıalynyń dırektory Gýlmıra Qojanııazova aıtyp berdi.
Búgingi kúni qor mamandary QR kod arqyly medısınalyq mekemelerge qalaı baǵa berý kerektigi jóninde jan-jaqty túsindirý jumystaryn júrgizilýde.
Aqtóbe