Esimi eki kúnniń birinde erekshe atalyp jatpasa da, elge sińirgen eńbegin eselep ólsheýge turarlyq jandar bolady. Sondaı esimniń biri, memleket qaıratkeri, Respýblıkalyq bıýdjettiń atqarylýyn baqylaý jónindegi esep komıtetiniń burynǵy múshesi Erlan Turlybekov.
Kásibı ómir jolynyń qyryq jyldan astam ýaqytyn elimizge adal qyzmet etýge arnaǵan azamat jaıly aıta otyryp, erteńgi bolashaq jas urpaqqa onyń ónegeli isterin úlgi etken durys.
Aldymen E.Qabykenulynyń týǵan topyraǵyn aıta ketken jón. Shyǵys Qazaqstan oblysy Tarbaǵataı aýdany Aqsýat aýylynda dúnıege kelgen Erlan mektepti úzdik bitirip, Almaty halyq sharýashylyǵy ınstıtýtyna oqýǵa túsedi. Eńbek jolyn Qazaq SSR Áleýmettik qamsyzdandyrý mınıstrliginde býhgalter-revızor retinde bastaıdy.
Jalpy, E.Qabykenuly 30 jylǵa jýyq Qarjy mınıstrligi men Parlament Májilisinde jumys isteıdi. Bul rette onyń uıymdastyrýshylyq jáne iskerlik qasıetteriniń arqasynda jaýapty qyzmetterdi abyroımen atqara bilýi – kópke úlgi eterlik dara qasıet. Joǵary zań shyǵarý organynda konsýltant laýazymynan Qarjy jáne bıýdjet komıtetiniń qyzmetin qamtamasyz etý jónindegi bólim meńgerýshisine deıin kóterilip, Májilis Tóraǵasynyń keńesshisi bolady.
Dos-jarandarynyń aıtýynsha, Erlan Qabykenuly kishkentaıynan sertke berik, alǵyr ári zerek bolyp ósedi. Ol óziniń týǵan aýdany Tarbaǵataı óńiriniń damýyna eleýli úles qosyp, aýyldastarynyń ózekti máselelerin sheshýge únemi atsalysady. «Týǵan jerge týyń tik!» degen sózdi iskerlikpen dáleldeý ońaı sharýa emes. Ásirese ózi týǵan óńirdiń mańyzdy áleýmettik nysandarynyń qurylysyn jandandyrýǵa kómektese júrip, etken eńbek, eken dánniń nátıjesinde aýdannyń Qurmetti azamaty atanady.
2006 – 2016 jyldary Erlan Qabykenuly Respýblıkalyq bıýdjettiń atqarylýyn baqylaý jónindegi esep komıtetiniń múshesi bolady. Osy jaýapty ári joǵary laýazymǵa ol Parlament Májilisiniń qaýlysymen eki márte taǵaıyndalyp, on jyl qyzmet etedi.
Osy kezeń ishinde memlekettik aýdıtpen aınalysatyn eń joǵary organnyń jumysy barynsha jetildirile tústi. Sondaı-aq respýblıkalyq bıýdjet qarajatynyń, memleket aktıvteriniń, salyqtyq jáne kedendik ákimshilendirýdiń tıimdi paıdalanylýyn baǵalaýǵa baǵyttalǵan baqylaý jáne saraptamalyq jumystyń zamanaýı ádis-tásilderi engiziledi.
E.Turlybekov sondaı-aq esep komıtetiniń múshesi retinde densaýlyq saqtaý, bilim berý jáne halyqty áleýmettik qorǵaý, aqparat, mádenıet, sport jáne quqyq qorǵaý salalary úshin jaýapty bolady. Eń bastysy, ózine senip tapsyrylǵan jumystardy tııanaqty oryndap, árdaıym memleket múddesin joǵary qoıa bilgen syıly azamat. Onyń jetekshiligimen júrgizilgen aýdıtorlyq tekserý jumystarynyń qorytyndysy boıynsha qarjylyq jáne ózge de quqyq buzýshylyqtar anyqtalyp, ondaǵan mıllıard teńge bıýdjetke qaıtarylǵanyn da aıta ketken durys.
Búginde jetpistiń jelkenin kóterip otyrǵan Erlan Qabykenuly osy ýaqytqa deıin kásibı jetistikteri, sonyń ishinde memlekettik jáne qoǵamdyq qyzmeti, elimizdiń áleýmettik-ekonomıkalyq jáne mádenı damýyna eleýli úles qosqany úshin «Qurmet» ordenimen jáne kóptegen medalmen marapattaldy.
Erlan Qabykenulynyń taǵy bir aıta ketetin jaqsy qasıeti – ózi tárbıelegen shákirtterine degen erekshe qamqorlyǵy men iltıpaty deýge bolady. Úlgili ustazdyń bul qasıetterin shákirtteri únemi aıtyp ta júredi. Bilýimizshe, onyń boıynda qatań talap ta, jumysqa jumyldyra bilý de, shydamdylyqpen túsindire alý da, óz qatelikterińdi túzeýge jáne bilimiń men qarym-qabiletińdi jetildire túsýge yntalandyrý da jaqsy úılesim tapqan. Biraq, eń bastysy, ol shákirtterin óziniń ómirlik tájirıbesi negizinde tárbıelep, adal ári tynymsyz eńbek etýge úıretedi. Tipti, jas mamandarǵa aqyl-keńesin aıtyp, memlekettik qyzmettiń qyr-syryn túsindirýden jalyqpaıtyn qamqorlyǵy naǵyz qazaq azamatyna tán dara qasıet shyǵar.
Mereıtoı qarasańy – belgili bir qorytyndy jasaıtyn kezeń. Erlan Qabykenuly eńbekqor ári kásibı maman retinde óz salasynda zor jetistikke jetkenin joǵaryda atap kettik. Onyń tabysty qyzmeti men taǵylymdy ǵumyry óskeleń urpaqty tárbıeleý, memleket pen qoǵamǵa adal qyzmet etý isinde kópshilikke árqashan úlgi-ónege bola alady.