Qazaqstan Prezıdenti Qasym-Jomart Toqaevtyń Germanııaǵa resmı sapary sheteldik basylymdardyń nazarynan tys qalǵan joq. Joǵary deńgeıdegi ekijaqty kezdesýler men kelisimder halyqaralyq BAQ-tyń baqylaýynda boldy. Sol jarııalanymdardyń birqataryn «Egemen Qazaqstan» gazetiniń oqyrmandaryna usynyp otyrmyz.
EurAsia Daily aqparattyq agenttigi Qazaqstan Prezıdenti men GFR Kansleri Angela Merkeldiń kezdeskenin habarlap, olardyń ekonomıkalyq seriktestik máselelerin talqylaǵanyn jetkizdi. Agenttik álemdegi eń úlken úkimet shtabtarynyń biri sanalatyn Federaldyq kansler vedomstvosynyń ǵımaraty aldynda Býndesverdiń bas orkestri Qazaqstan men Germanııanyń Ánurandaryn oryndaǵany, artynsha sap túzegen qurmetti qaraýyl rotasy aldynda Federaldy Kansler jáne Qazaqstan Prezıdentiniń júrip ótkeni, eki eldiń delegasııasynyń tanysý jaıyn baıandaıdy. «Shamamen bir jarym saǵatqa sozylǵan kelissóz barysynda eki el arasyndaǵy seriktestik, ásirese ekonomıkalyq qatynas sóz boldy», delingen halyqaralyq agenttik habarynda.
Ispanııalyq Spain news aqparattyq agenttigi Qasym-Jomart Toqaevtyń Prezıdent retinde Eýropa odaǵy boıynsha alǵashqy resmı saparyn Germanııadan bastaǵanyn aıtyp, Memleket basshysynyń «Qazaqstan úshin osy elmen yntymaqtastyqty nyǵaıtýdyń mańyzy zor» degen sózin jarııalady. Oǵan qosa Germanııa Qazaqstanǵa tikeleı ınvestısııa salýshy elderdiń tiziminde 12-orynda ekenin habarlaı kele, Qazaqstan Prezıdentiniń aldaǵy ýaqytta Qazaqstannyń ártúrli saladaǵy 700-den astam jobany jekeshelendiretini týraly málimdemesi men bul jańalyqtyń óz kezeginde germanııalyq ınvestorlar men kompanııalarǵa jaqsy múmkindik bolatynyn jazady. Sonymen birge Qazaqstannyń Germanııa ınvestorlary úshin arnaıy jeńildikter usynyp otyrǵanyn da habarlaıdy. Agenttik habarlamasynda Germanııaǵa eksporttalatyn taýar kóleminiń sońǵy 8 aıda 21,4%, ıaǵnı 2,258 mlrd eýroǵa tómendegeni de nazarǵa alynǵan.
Interfax halyqaralyq agenttigi Qasym-Jomart Toqaev pen Angela Merkeldiń jýrnalıstermen ótkizgen baspasóz máslıhatynda Qazaqstannyń dýaldi bilim berý júıesinde nemis tájirıbesin qoldanatyny týraly aıtylǵanyn habarlaıdy. Osylaısha, agenttik eki eldiń aldaǵy ýaqytta bilim berý salasynda yntymaqtastyqty jalǵastyratynyn jazady.
Vestnık Kavkaza aqparattyq-saraptamalyq agenttigi Qazaqstan Prezıdentiniń sapar barysynda Deutsche Welle arnasyna suhbat bergenin, onda Qasym-Jomart Toqaevtyń Germanııa Qazaqstannyń Eýropadaǵy negizgi seriktesi, Germanııanyń Ortalyq Azııa elderimen jasaıtyn saýda-sattyǵynyń 86 paıyzy Qazaqstanǵa tıesili ekenin aıtqanyn habarlaıdy. Odan ári Qasym-Jomart Toqaev GFR Prezıdenti Frank-Valter Shtaınmaıermen, Germanııanyń eks-kansleri Gerhard Shredermen jáne germanııalyq jetekshi bıznes ókilderimen kezdeskenin, alǵashqy kúni Germanııanyń isker toptarymen birlesken keshki as ishkenin habarlaıdy.
Eurasia Diary agenttigi Q.Toqaevtyń resmı sapary Qazaqstan men Germanııa seriktestigin nyǵaıta túsedi degen tujyrym jasaıdy. «Germanııa Federatıvtik Respýblıkasynyń Kansleri Angela Merkel kezdesý barysynda Qazaqstanmen berik yntymaqtastyqtyń ornaǵanyn, buǵan deıin Elbasy Nursultan Nazarbaevpen ózara túsinistikte jumys istegenin atap ótip, Qasym-Jomart Toqaevtyń eki el arasyndaǵy yqpaldastyqty jańa deńgeıge kóteretinine senim bildirdi, sondaı-aq kelissózderdiń nátıjeli ótkenin aıtty», dep jazady basylym.
Belt and Road News Network halyqaralyq medıa agenttigi Qazaqstan Prezıdenti men Germanııanyń burynǵy Federaldyq Prezıdenti Horst Kıolermen kezdesýinen aqparat taratty. Agenttiktiń jazýynsha, kezdesý barysynda taraptar keler jyly Nur-Sultan qalasynda ótetin Dúnıejúzilik saýda uıymy mınıstrleriniń konferensııasyna daıyndyq barysyn, Qytaıdyń «Bir beldeý, bir jol» jobasy aıasyndaǵy yqpaldastyq sharalaryn, sondaı-aq álemdegi saıası ahýaldy talqylaǵan.
The Latin American Herald Tribune jýrnaly Qasym-Jomart Toqaevtyń resmı sapary nátıjeli ótkenin habarlap, birqatar kelissóz júrgizilgenin jazady. «Osy jyldyń toǵyz aıynda qos memleket arasyndaǵy taýar aınalymy 1,3 mlrd dollardy qurady. 2005 jyldan bastap osy jyldyń ekinshi toqsanyna deıin Germanııadan Qazaqstanǵa tartylǵan tikeleı ınvestısııa kólemi 5,2 mlrd dollardy qurady. Germanııanyń Qazaqstan ekonomıkasyna ınvestısııalarynyń 90 paıyzdan astamy shıkizattyq emes sektorǵa tıesili» deı kele, bul sapardan keıin seriktestik pen ınvestısııanyń kólemi arta túsetinine boljam jasaıdy.