Qaraǵandy oblysynyń ákimdigi men «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» aksıonerlik qoǵamy yntymaqtastyq týraly memorandýmǵa qol qoıdy.
Bul kelisim boıynsha Qaraǵandy oblysynda ondaǵan jyl boıy jumys istemeı kelgen lıftiler jeltoqsan aıynda tolyǵymen jańasyna aýystyrylady. Aıta ketý kerek, Qaraǵandy oblysy atalǵan baǵdarlamany iske asyrý boıynsha synamaly óńir retinde tańdalyp otyr. Aldaǵy ýaqytta bul jobany elimiz boıynsha júzege asyrý josparlanǵan.
Kezdesý barysynda oblys ákimi Jeńis Qasymbek joǵaryda atalǵan máseleniń ózektiligin atap ótti.
– Qaraǵandy oblysy boıynsha Qaraǵandy, Temirtaý, Balqash, Jezqazǵan, Shahtınsk, Sátbaev, Saran jáne Abaı qalalarynda lıft sharýashylyǵyna tolyqtaı tekserýler júrgizildi. Kópqabatty úılerde 361 lıft jumys istemeıdi. Budan bólek taǵy 800-ge jýyq kótergish qurylǵylardyń paıdalaný merzimi aıaqtalýǵa jaqyn. «TKSh jańǵyrtý men damytýdyń qazaqstandyq ortalyǵymen» birlesip, biz úlken jumysty bastaımyz. Synamaly jobany iske asyrýǵa jeltoqsan aıynda kirisemiz. Jyl sońyna deıin 10-20 lıfti aýystyrýdy josparlap otyrmyz. Bul tek bastamasy ǵana. Al kelesi jyly 160-170 jańa lıft ornatamyz, – dedi óńir basshysy.
«Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ ókilderi qaraǵandylyqtardyń synamaly jobany júzege asyrýǵa daıyn ekendikterin jetkizdi. Munyń ózi jumysty jedel bastaýǵa múmkindik beredi.
– Lıft sharýashylyǵynyń máselesi – búkil el úshin ózekti. Respýblıkada 4 myńnan astam lıft aýystyrýdy qajet etedi. Baǵdarlamany synamaly rejimde Qaraǵandy oblysynda iske qosamyz. Qarjy bólinedi. Mehanızmderdi jetildiremiz, – dep atap ótti «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ tóraǵasynyń orynbasary Meıirjan Mákenov.
Bul maqsatqa atalǵan ortalyq segiz jyl merzimge 2 mlrd teńge kóleminde qaryz beredi. Turǵyndar bul qarajatty birtindep óteıtin bolady. Esep aıyrysý boıynsha ár páterden aı saıynǵy tólem 4 myń teńgeden aspaıdy.
Oblys ákimi bul jobanyń qysqa merzim ishinde kóp jyldan beri qordalanǵan problemany sheshýge múmkindik beretinin atap ótti.
– Meniń oıymsha, nesıe sharttary jeńildetilgen jáne qolaıly. Biz aldyn ala úı turǵyndarymen jıyndar ótkizdik, tártip túsindirildi. Árıne, belgili bir máseleler boldy. Máselen, áleýmettik osal sanattaǵy otbasylar úshin basqa ólshemder bolady. Olar turǵyn úı kómegi arqyly shyǵyndardy óteıdi. Jalpy, turǵyndar osy baǵdarlamany asyǵa kútip otyr dep aıtqym keledi. Kún saıyn 8-9-shi qabatqa jaıaý shyǵý yńǵaısyz jáne óte qıyn. Meniń oıymsha, kelesi jyly osy problemany túbegeıli sheshýge bolady, – dedi Jeńis Qasymbek.
Qaraǵandy oblysynda 2021 jylǵa deıin kópqabatty úılerdegi jumys istemeıtin 361 lıft tolyǵymen aýystyrylady dep josparlanǵan. Bul degenińiz, aldaǵy ýaqytta atqarýshy bılik barlyq lıft sharýashylyǵyn normatıvtik talaptarǵa saı keltiredi degen sóz.
QARAǴANDY