Sharaına
Advokat Anatolıı Kýcherenanyń aıtýynsha, OBB-nyń burynǵy qyzmetkeri Edvard Snoýdenniń RF-nyń Federaldyq mıgrasııalyq qyzmetine bergen jáne onyń Reseıde ýaqytsha turý quqyn alýyna jaǵdaı jasaıtyn qujattaryn qaraý merzimi aıaqtaldy.
Federaldyq mıgrasııalyq qyzmet tájirıbesi boıynsha mundaı materıaldar jeti kúnge deıin qaralady, odan keıin Snoýdenniń Reseı aýmaǵynda emin-erkin júrip-turýyna múmkindik beretin arnaıy anyqtama beriledi. Biz ótinishti 16 shilde kúni berdik, dep atap kórsetken advokat. Al Federaldyq mıgrasııalyq qyzmet E.Snoýden ótinish bergennen keıin bes jumys kúni ótkenin, sondyqtan sheshim qabyldanýǵa tıis ekendigin rastap otyr. Ondaı jaǵdaıda Snoýdenniń Sheremetevo áýejaıynan shyǵýyna múmkindik týady.
Parlamentshiler minez kórsetti
Bolgar parlamentshileri sársenbige qaraǵan túngi narazylyq aksııasynan keıin jumysqa shyqpaı qoıdy. Olardy parlament basshysy Mıhaıl Mıkov jumysqa shyǵýdan bas tartýǵa shaqyrǵan.
Sársenbige qaraǵan túni narazylyq aksııasyna qatysýshylar parlament ǵımaratynan shyǵatyn esikti jaýyp tastaǵan. Ol kezde ǵımarat ishinde 100 adam bolǵan. Tek tańerteńgilik qana barrıkadany buzyp, adamdardy ǵımarattan shyǵaryp alýdyń sáti túsken. Sofııada narazylyq aksııalary osydan bir aı buryn, memlekettik qaýipsizdik qyzmeti basshysy laýazymyna medıa-magnat Delıan Peevskı taǵaıyndalǵannan soń bastalǵan bolatyn.
Mýrsıdiń qaıda ekeni beımálim
О́tken dúısenbi kúni Egıpettiń taǵynan qulatylǵan prezıdenti Muhammed Mýrsıdiń uly Ýsama Mýrsı ákesiniń qaıda ekeniniń áli kúnge deıin belgisiz kúıde qalyp otyrǵanyn málimdegen.
Áli kúnge deıin meniń ákemniń qaı jerde ekeni belgisiz bolyp otyr. Biz onyń qaı jerde otyrǵanyn jáne ne úshin qamaýǵa alynǵanyn bilmeımiz, dep atap kórsetken Russia Today telearnasyna bergen suhbatynda Ýsama Mýrsı. Sondaı-aq ol Egıpettegi qazirgi ahýalǵa da túsinik bergen. Onyń aıtýynsha, 2011 jyldyń kókteminde bastalǵan Egıpettegi tóńkeris óziniń alǵashqy kúninen bastap búginge deıin beıbit tóńkeris bolyp qalyp otyr. Al qazirgi bıliktiń aýysýyna Hosnı Múbárak rejimin jaqtaýshylar kináli.
Oqýshylar dáriden ýlandy
Anemııaǵa qarsy kúres jónindegi memlekettik baǵdarlamada qarastyrylǵan dárilerdi paıdalaný saldarynan Úndistanda 900-ge jýyq mektep oqýshysy ýlanyp qalǵan. Bul týraly RIA Novostı agenttigi habarlap otyr.
Belgili bolǵanyndaı, balalarǵa folı qyshqyly bar tabletkalar qabyldaý usynylǵan, onyń sońy ýlanýǵa aparyp soqtyrǵan. Dári qabyldaǵan oqýshylar densaýlyqtarynyń nasharlap, ishteriniń aýyratyndyqtaryna, loqsyp, qusqylarynyń keletindigine shaǵym jasaǵan. Barlyq zardap shekken balalarǵa medısınalyq kómek kórsetilýde. Aıta ketý kerek, memlekettik baǵdarlamaǵa barlyǵy 1,6 mıllıon bala qatysqan.
AQSh Sırııaǵa shabýyl josparlaýda
Amerıka armııasy Sırııadaǵy daý-janjalǵa áskerı aralasýdyń josparyn jasady. AQSh Kongresi bolsa, sırııalyq oppozısııany qarýlandyrýǵa salynǵan tyıymnyń kúshin joıdy, biraq Sırııaǵa qarý-jaraq jetkizýde qatań eseptilik talap etip otyr.
О́z kezeginde amerıkalyq áskerıler zań shyǵarýshylarǵa Sırııaǵa qashyqtyqtan shabýyl jasaý josparynyń qyr-syryn baıandap berdi. Al ol el úshin mıllıardtaǵan dollarǵa túspekshi jáne operasııanyń tabysty bolaryna eshqandaı kepildik joq. Kongrestegi sırııalyq oppozısııany jaqtaýshylar AQSh-tan qarý-jaraq jetkizý aldaǵy tamyz aıynda bastalady dep úmittenip otyr.
Otaǵa... burǵyny paıdalanǵan
Moldavııanyń densaýlyq saqtaý mınıstri Andreı Ýsatyı Kıshınevtegi Valentın Ignatenko atyndaǵy balalar aýrýhanasynda qurylys burǵysyn paıdalanyp ota jasaǵan hırýrgti jazalaýdy talap etti.
Bormashınany osylaısha operasııaǵa jasaýǵa bolady dep túsingen dıletant paıdalanǵan, aýrýhananyń qural-saımandarynyń ishinde ondaı mashına joq, dep málimdegen mınıstr. Jaǵdaıdyń bulaısha órbýine taıaýda BAQ-tarda paıda bolǵan aýrýhananyń travmatologııa bóliminiń dárigerleri túsirgen beınekórinis sebepker bolyp otyr. Onda medıkterdiń qurylys burǵysyn, tisteýikter men balǵany paıdalanyp, operasııa jasap jatqandary kórsetilgen bolatyn.
Bir táýlikte 22 adam qaza tapty
Meksıkanyń Mıchoakan shtatynda s ońǵy táýlikte bolǵan atystar saldarynan kem degende narkokarteldiń 20 sodyry jáne 2 polısııa qyzmetkeri qaza tapqan.
Bı-Bı-Sı-diń Meksıkadaǵy tilshisi Ýıll Granttyń aıtýyna qaraǵanda, táýlik ishinde osynsha adamnyń qaza tabýy tipti Mıchoakan ólshemi boıynsha da óte kóp. Tilshiniń habarlaýynsha, atys avtomattarmen qarýlanǵan narkokartel sodyrlary polıseılerdiń jolyn tospaq bolǵan kezde týyndaǵan. Sóz oraıynda Mıchoakan shtaty aýmaǵynyń basym bóliginiń «Tamplıer-rysarlar» atty narkokarteldiń baqylaýynda ekenin aıta ketý qajet.
Naýbaıhanadaǵy jarylys
Pekınde naýbaıhanalardyń birinde bolǵan jarylystan eki adam qaza tapqan. Aldyn ala málimetter boıynsha, taǵy 9 adam túrli dene jaraqattaryn alǵan kórinedi.
Zardap shekkenderdiń tórteýiniń jaǵdaıy óte aýyr. Jarylys jergilikti ýaqyt boıynsha 7 saǵat 33 mınýtta oryn alǵan. О́rt sóndirýshiler jalyndy aýyzdyqtap, árqaısysy 50 lıtr bolatyn suıytylǵan gaz quıylǵan 2 ballondy syrtqa shyǵarǵan. Qutqarýshylardyń aıtýlarynsha, eger ol ballondar jarylǵanda onyń zardaby áldeqaıda aýqymdy bolmaq eken.
Internet materıaldary negizinde ázirlendi.