BIRDE...
Ataqty sýretshi Rerıhtyń sheberhanasynda bir synshy sýretshiniń «týyndysyna» qarap turyp:
– Qandaı ǵajap dúnıe! О́zindik órnek, ózgeshe qubylys qoı mynaý! – dep tańdanys bildirgende Rerıh:
– E, ol ana sýret salyp jatyp qalamymdy álsin-álsin tazartyp turatyn oryn ǵoı... – degen eken.
***
Keńester odaǵynyń halyq artısi Mahmýd Esambaev 1991 jyldyń naýryz aıynda telebaǵdarlama júrgizýshi Sergeı Dıtıachevke búkilodaqtyq syılyqtyń dıplomyn tapsyryp:
– Joǵarǵy ataǵyń qutty bolsyn! – dep quttyqtaǵanda Sergeı Dıtıachev:
– E, bul ataqty osymen úshinshi ret alýym... Osy búkilodaqtyq úsh ataqty bir ǵana «Reseıdiń eńbek sińirgen artısi» degen ataqqa aıyrbastap almasqa bolmas pa eken... Aıyrma bolsa men tóleýge ázirmin... – degen eken.
***
Onore de Balzak grafologııamen aınalysqandy, ıaǵnı adamnyń jazýyna qarap minez-qulqyn, bolashaǵyn ajyratýdy jaqsy kórgen eken. Bir bıkesh Balzakqa oqýshynyń dápterin kórsetedi de, jazýyna qarap oqýshynyń bolashaǵy týraly aıtyp berýin ótinedi.
– Siz bul balanyń sheshesisiz be?
– Joq.
– Onda men bar shyndyqty aıta alady ekenmin: bul bala – jeńiltek, jalqaý ári topas. Onyń qolynan esh jaqsylyq kelmeıdi.
Bıkesh ishek-silesi qatyp kúledi.
– Balzak myrza, siz qalaısha ózińizdiń jazýyńyzdy tanymaı qaldyńyz? Bul sizdiń mektepte oqyp júrgendegi dápterińiz ǵoı...
Sol kúnnen bastap Balzak grafologııamen aınalasýyn doǵarypty.
***
Brejnev kabınetine kirgen Sýslovqa:
– Joldas Sýslov, siz meniń « Tyń» atty kitabymdy oqydyńyz ba? – deıdi.
Sasyp qalǵan Sýslov:
– Oqyǵanda qandaı, Leonıd Ilıch, eki qaıtara oqyp shyqqanmyn, – dep ketýge asyǵady.
– Kirýińizden ketýińiz jyldam boldy ǵoı? – deıdi Brejnev.
– « Tyńyńyz» ǵajap kitap, úshinshi ret oqyp shyqsam ba dep turǵanym, – dep shyǵa jóneledi.
Sonda Leonıd Ilıch oılanyp: «Oıpyr-aı-á, bári ǵajap kitap deıdi... qoı, ony men de oqyp tastaıynshy...» – dep «Tyńdy» qolyna alypty.