Bıyl 100 jyldyq mereıtoıyn atap ótkeli otyrǵan ǵasyrlyq basylymda talaı-talaı tulǵalar qyzmet etkeni belgili. Bas basylymnyń ıgiligi úshin ómiriniń kóp bóligin arnaǵan olardyń árbiriniń eńbegi ólsheýsiz. Solardyń biri gazette 32 jyl túrli jaýapty qyzmette jumys istegen Rysbala Ábdiqadyr ózi eńbek etken jyldardaǵy estelikke toly áńgimesimen bólisti.
Rysbala Ábdiqadyr 1985 jyly «Egemen Qazaqstan» gazetiniń menshikti tilshiler bólimine úılestirýshi bolyp jumysqa qabyldanady. Ol kezde basylymnyń ataýy «Sosıalıstik Qazaqstan» bolatyn. Osy sátten bastap onyń óz jumysyna degen qushtarlyǵy men bas basylymǵa degen mahabbaty jaýapkershilik, tııanaqtylyq atty asyl qasıetterin ushtap otyrdy. Qatań tártipke qurylǵan qyzmettiń júgi qanshalyqty jaýapty ekenin jiti sezdirdi. R.Ábdiqadyrdyń aıtýynsha, redaksııadaǵy ár kún qyzyqqa toly qarbalaspen ótetin. Ol tusta tehnıkanyń múmkindikteri búgingideı bolmasa da ár oblystyń mańyzdy aqparaty der kezinde gazet betine shyǵyp otyratyn. Shaǵyn kólemdi aqparattar telefon arqyly alynyp, jazý mashınkasymen qaǵaz betine túsken bolsa, al keń aýqymdy maqalalar poshta arqyly jetip otyratyn bolǵan.
R.Ábdiqadyr menshikti tilshiler bólimindegi qıyn da qyzyq qyzmetine tez beıimdelip ketedi. Menshikti tilshiler men bólim basshylarynyń arasyn jalǵap, óz jumysyn jaýapkershilikpen atqaryp júrgeninde ony taǵy bir jaýapty qyzmet kútip turady. Araǵa jyldar salyp gazet redaksııasy 1999 jyly elordaǵa, qazirgi Nur-Sultan qalasyna, kóshiriledi. Osy kezeńde R.Ábdiqadyr basylymnyń jańa ashylǵan elektrondy bóliminde jumys isteıdi. О́z qyzmetine ábden úırengen ol jańa qyzmettiń de jumysyna tez úırenisedi. Alǵashynda kompıýtermen qalaı jumys isteımin degen qorqynysh bolsa da, mamandyǵyna degen mahabbaty onyń qyzmettik qabiletin arttyra tústi. Munda ol gazetti basyp shyǵaratyn barlyq baspahanalarmen tyǵyz baılanysta qyzmet atqardy. Basylymnyń ár oblysqa keshikpeı óz ýaqytynda jetýi úshin baryn saldy.
Keıinirek tehnologııa qarqyn alyp zaman talaby ózgergen soń, gazet oqyrmandaryna basylymnyń elektrondy nusqasyn da usyný qajet boldy. Osylaısha 2005 jyly «Qazaq ınterneti» qoǵamdyq birlestiginiń usynysymen «Egemen Qazaqstan» gazetiniń saıty quryldy. Osy sátte sol tustaǵy basylym basshysy Erjuman Smaıyl R.Ábdiqadyrdy endi saıt jumysyn júrgizý úshin jaýapty qyzmetker retinde tańdaıdy. Osylaısha ol saıttyń eń alǵashqy qyzmetkeri retinde jumysyn ári qaraı jalǵastyrady.
Basylymǵa 90 jyl tolǵanda 2009 jyly mereıli toıǵa Tuńǵysh Prezıdent-Elbasy Nursultan Nazarbaev arnaıy qatysyp, kúndelikti gazettiń qaǵaz nusqasymen qatar onyń elektrondy nusqasyn da oqıtynyn aıtady. Elbasynyń osy bir sózi saıttyń jumysyn odan ári jandandyrýǵa sebep bolady. Budan soń 2010 jyly sol tustaǵy basylym basshysy Erjuman Smaıyl saıttyń negizin salyp, alǵashqy sulbasyn jasaǵan Serikqazy Kókenaıdy redaksııaǵa arnaıy shaqyrtyp gazet ishinen «Veb-saıt» shyǵarmashylyq toby qurylady. Budan soń gazettiń kúndelikti sanyn saıtqa jarııalap otyrǵan R.Ábdiqadyrdyń janyna qosymsha 4 qyzmetker alynyp, saıt jumysy keńeıe túsedi.
R.Ábdiqadyr qyzmet etken jyldary búgingideı jyldam ınternet bolmady. Soǵan qaramastan ol ózińiń jumysyn úlken jaýapkershilikpen istedi. Onyń aıtýynsha, gazettiń pdf nusqasyn saıtqa júktegende neshe túrli qyzyq jaǵdaılar bolǵan. Uzaq ýaqyt boıy daıyndap salǵan jumysy jarııalanar sońǵy sátte telefonǵa jalǵanǵan kabeldi ınternet isten shyǵyp ketetin de sátter bolǵan. Al ony qaıta jasap salý eńbek pen shydamdy qajet etedi. Alaıda R.Ábdiqadyr úshin bul asa qıyndyq týǵyzbaıtyn. Onyń aıtýynsha, mundaı ınternetpen jumys isteýdiń de qyzyǵy mol edi.
Gazet betterin daıyndaýshy jumys toby tún ortasyna deıin eńbektengen bolsa, «Veb-saıt» shyǵarmashylyq tobynyń jumysy tań ata bastalǵan. R.Ábdiqadyr jumysqa tań atysymen kelip, jurt jumysqa keler ýaqytta barlyq isin tyndyryp qoıatyn. Qatań tártipke qurylǵan jumysta bir mınýt ta keshigýge bolmaıtyn. Gazet materıaldary dál tańǵy 09:00-de saıtta jarııalanyp turatyn. «Basylym betindegi ár maqalany, tipti, 1-2 sóılemmen ǵana berilgen aqparatty túgel saıtqa júktemesem, búkil gazetti salmaǵandaı kúı keshetinmin. Ár aqparattyń mańyzyn túsinip, oǵan jaýapkershilikpen qaraǵandyqtan bolar, mereke kúnderi de tań atysymen kelip, óz jumysymdy óz deńgeıinde isteýge tyrysatynmyn», dep R.Ábdiqadyr súıikti basylymyn erekshe saǵynyshpen eske aldy.
О́miriniń 32 jylyn gazetke qyzmet etýge arnaǵan R.Ábdiqadyr basylymda 1985-2017 jyldar aralyǵynda jumys istedi. Qurmetti demalys – zeınetkerlikke de bas basylymnan shyqty. «Aqparat salasynyń úzdigi» tósbelgisiniń, «Eńbektegi erligi úshin» medaliniń jáne birneshe alǵys hattar men qurmet gramotalarynyń ıesi búginde 100 jasqa tolǵan ǵasyrlyq basylymnyń torqaly toıyna quttyqtaý tilegin aıtyp, gazettiń el eńsesin tiktep, ulttyq qundylyqtardy dáripteýde ólsheýsiz úles qosa beretinine senim bildirdi.