Seısenbi kúni keshkisin Qaraǵandyda Chempıondar lıgasynyń ekinshi irikteý kezeńiniń ekinshi oıynynda da Belarýstiń BATE-sin 1:0 esebimen jeńgen «Shahter» komandasy kelesi aınalymǵa shyqty.
Endi «Shahter» úshinshi kezeńde Albanııanyń chempıony «Skenderbeý» komandasymen kezdesedi. Eger ony jeńse, pleı-off kezeńine shyǵady. Bul «Shahterdiń» Eýropa lıgasynyń toptyq kezeńinde oınaıtynyn bildiredi. Demek, kezdesýde jeńilsek te, Eýropa lıgasynyń toptyq kezeńinde oınaımyz. Al, jeńsek «Shahter» toptyq týrnırge qatysyp, Eýropanyń alańdarynda kileń myqtylarmen kúsh synasady. Endi «Shahterdiń» seısenbi kúni keshkisin qarsylasyn utyp, búkil Qazaqstandy ózine qaratqan oıynyna kelsek, bul kezdesýde qaraǵandylyq komanda belorýstarǵa qaraǵanda senimdi oınady. Kezdesýde «Shahter» barlyq jaǵynan BATE-den basym tústi.
Qazir bizge oıynnyń bastan aıaq qalaı ótkenin tizip, jazyp otyrýdyń qajeti shamaly. Erekshe atap óterlik jaıt, «Shahterdiń» qorǵanysy men qaqpashysy Aleksandr Mokınniń janqııarlyq oıyny komandanyń jeńiske jetýine kóp kómegi tıdi. Ol qonaqtardyń barlyq soqqylaryn qaıtaryp, oıynnyń sońyna deıin qaqpany taza saqtady. Bul kezdesýde qaqpany BATE-niń 15 soqqysyn ǵana emes, 67-mınýtta oıdan shyǵarylǵan penaltıdiń ózin de qaıtaryp tastady. Kezdesýde «Shahterdiń» qorǵanysy belorýstardyń barlyq shabýylyna tosqaýyl qoıyp, gol soǵýǵa múldem múmkindik bermedi. Qaıta, búkil oıyn boıy bizdiń qorǵaýshylar qarymta shabýylǵa jaǵdaı týǵyzyp, shabýylshylarǵa kómektesip otyrdy. Sondaı kezdiń birinde qarsylastar alańynda jalǵyz júrgen Igor Zenkovıchke pas shyǵaryp, onyń gol soǵýyna jaǵdaı jasady. Jalpy, «Shahterdiń» seısenbi kúngi oıyny bárimizdiń kóńilimizden shyqty. Al oıynshylary oıyn órnegimen, jankeshtiligimen kózge tústi. Eń bastysy, qaraǵandylyqtar búkil Qazaqstannyń atyn Eýropa alańdaryn aıqaılatyp shyǵaratyndaı komanda ekenin kórsetti.
Búgin Eýropa lıgasynyń ekinshi kezeńiniń jaýapty kezdesýleri ótedi. Bizdiń Pavlodardyń «Ertis» komandasy syrt alańda Bosnııa jáne Gersogovınanyń «Shırokı Brıeg» klýbymen oınasa, «Aqtóbe» óz alańynda Norvegııanyń «Hedd» klýbyn qabyldaıdy.
Dastan KENJALIN,
«Egemen Qazaqstan».