Jetisý jerinde dástúrge aınalǵan ıgiliktiń biri – aýdandardyń mádenıet kúnderin ótkizý. Bul shara sońǵy jyldary júıelenip, úsh-tórt aýdannyń mádenıetke qatysy bar ókilderiniń basyn sol aýdan turǵyndaryna yńǵaıly óńirlerde qosyp ótkizilýde.
Bul kúni mádenıet kúnderin ótkizgen Qarasaı, Jambyl, Talǵar aýdandarynyń aqyn-jazýshylarymen ótken jarqyn júzdesýdi Sáken Seıfýllın atyndaǵy Almaty oblystyq kitaphanasynyń bas dırektory Maqpal Nurǵalıeva qorytyndylap, ár aýdannyń kitaphana basshylary aqyn-jazýshylaryna ózindik syı-sııapatyn tartý etti.
Úsh alańǵa bólinip qazdaı tizilgen sansyz shatyrlarda úsh aýdannyń mádenıeti men ónerinen syr berer, ózindik erekshelikterin tanytar, halqynyń bereke-birligin pash eter kórmelerdi aralaǵan kópshilik sol kórmelerdiń bir-bir qanatyn ala ornalasqan ulttyq-mádenı ortalyqtardyń án-bıin tamashalady. Kórshiles, tamyrlas, taǵdyrlas aýdandar turǵyndarynyń birimen-biriniń tanysyp-bilisýi, aǵaıyndaı aralasýy, úlgi alarlyq úrdispen ún qatysýy degen osyndaı-aq bolar. Jaqsy isterin jarııa etisip, bir-biriniń qol jetkizgen jetistikterine kýá bolysqan jurttyń ishinde áriptestik baılanys ornatýǵa nıettengender de, ulttyq qolóner sheberleriniń qaıtalanbas biregeı buıymdaryn syıkáde retinde satyp alyp jatqandary da kóp boldy. Túrik, uıǵyr, slavıan, koreı, cheshen, ózbek, dúngen, kúrd sııaqty ulttardyń dástúr-saltymen merekege aıshyqty atsalysýy mádenıet kúniniń mán-mańyzyn asha tústi. Qarasaı, Jambyl, Talǵar aýdandarynyń ekonomıkalyq áleýetin baıqatatyn kásipkerlik salasyna da kórmeden oryn berilgen. Osy sharanyń aıasynda belgili aqyn, jýrnalıst-jazýshy, «Egemen Qazaqstan» gazeti Almaty bólimshesiniń jetekshisi Qorǵanbek Amanjoldyń «Alapa» atty jyr jınaǵynyń tusaýkeser rásimi ótkizildi. Kóne túrkilik uǵymda yrys, baq, dáýlet degen maǵynaǵa ıe «Alapa» atty jınaqpen jurtshylyqty tanymal aqyn, jýrnalıst Musa Janádilov tanystyrdy. Sodan soń bıyl 60 jyldyq mereıin atap ótpekshi Qorǵanbek aqynnyń qanattas inileri avtorǵa zor tebirenisti tilekterin jetkizip, arnaý óleńderin oqydy. Kezdesýge qatysýshylar aldynda kitabynyń tusaýkeserin ótkizgen mereı ıesi, aqyn Qorǵanbek Amanjol sóz sóılep, kópshilikke zor iltıpatyn bildirip, alǵysyn aıtty.
Dástúrli shara aýdandar kórkemónerpazdarynyń mádenıet kúnine arnaıy ázirlegen konserttik baǵdarlamalarymen túıindeldi.
Nurbol ÁLDIBAEV,
«Egemen Qazaqstan».
Almaty oblysy.