Búgingi tańda Jambyl oblysy, Sarysý aýdanynyń qystaýdaǵy sharýalaryn qasqyrlardyń kóbeıip ketýi alańdatyp otyr. Bir sharýanyń ózinen jyl basynan beri irili-usaqty 11 mal shyǵyn bolǵan eken. Bul árıne mal sharýashylyǵymen aınalysyp otyrǵan malshylarǵa ońaı bolmaıtyny anyq. Degenmen, jergilikti ákimdik sharýalarǵa kómek qolyn sozyp, ıt-quspen kúresýde pármendilik tanytýda.
«Aldyńǵy demalysta, ıaǵnı, 30 qarasha kúni Jaıylma, Igilik, Jańatalap aýyldyq okrýgterine qarasty 25 sharýashylyq, osy demalys kúni Jaıylma, Dosbol aýyldyq okrýgterine qarasty 22 sharýashylyq, barlyǵy 47 sharýashylyqtyń qystaýlary aralanyp, zerdelendi. Aýyldardaǵy 47 sharýashylyqta 1979 múıizdi iri qara, 16211 ýaq mal, 1037 jylqy, 730 túıe qysqa túsken. Maldyń qońy jaqsy. Keı jerlerde jantaq pen ızen qalyń. Sharýashylyqtar qysqa qajetti mal azyǵymen qamtylǵan. Sharýalardy alańdatyp otyrǵan másele – ıt-qustyń kóbeıip ketýi. Bir sharýadan jyldyń basynan beri irili-usaqty 11 mal shyǵyn bolǵan», deıdi Sarysý aýdanynyń ákimi Qanatbek Mádibek.
Ákimniń aıtýynsha, kún sýytqaly beri taı-týlaqty qoıyp, tý bıeler de ıt-qusqa jem bolyp jatyr eken. Osy oraıda Qanatbek Mádibek zań talaptaryna saı tıimdi jospar qurý qajettigin, sebebi bul maldan buryn adamǵa qaýipti bolýy múmkin ekenin aıtady. Jalpy, búginde aýdan boıynsha 168 sharýa malymen eldi mekenderden tys jerlerde otyr eken.
Jambyl oblysy