«Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýyn iske asyrý aıasynda Bilim jáne ǵylym mınıstrliginiń qoldaýymen «О́rleý» Biliktilikti arttyrý ulttyq ortalyǵy» 2018 jyldan bastap mektepke deıingi, orta, qosymsha, tehnıkalyq jáne kásiptik, joǵary bilim uıymdary úshin 22 nomınasııa boıynsha beıne-sabaqtar men beıne-dáristerdiń «Pedagogıkalyq ıdeıalar panoramasy» konkýrsyn jyl saıyn ótkizip keledi. Bıylǵy jyly konkýrstyń qorytyndysy boıynsha jeńimpazdardy marapattaý saltanaty Táýelsizdik kúni merekesine oraı, 11 jeltoqsanda «О́rleý» Biliktilikti arttyrý ulttyq ortalyǵy» AQ fılıaly Shyǵys Qazaqstan oblysy boıynsha Pedagog qyzmetkerlerdiń biliktiligin arttyrý ınstıtýtynda ótti, dep habarlady ınstıtýttyń Baspasóz qyzmetinen.
Instıtýt qabyrǵasynda «О́rleý» BAUO» AQ Basqarma tóraıymy G.K. Ahmetova, fılıal dırektorlary, bilim jáne ǵylym salasynyń kórnekti qaıratkerleri, jergilikti ákimshilik ókilderiniń qatysýymen ótken sharada birinshi oryn ıelengen júldegerler men 2,3-oryn ıelengen shyǵysqazaqstandyq jeńimpazdardy marapattaý rásimi ótti. Marapattaý saltanaty YouTube-tegi «О́rleý Bilim kanaly» boıynsha kórsetildi. Konkýrstyń Respýblıkalyq kezeńine ótken muǵalimderge «О́rleý» BAUO» AQ Basqarma tóraıymynyń «Alǵys haty» berildi.
Biryńǵaı aqparattyq-bilim keńistiginde zamanaýı pedagogıkalyq tájirıbeni jınaqtaý jáne nasıhattaý, pedagogterdiń aqparattyq-kommýnıkasııalyq jáne tehnologııalyq quzyrettilikterin arttyrýdy kózdeıtin konkýrsqa Qazaqstannyń 1980 muǵalimi qatysty. Osynaý dúbirli saıysqa Almaty qalasynan 70-ke tarta ustaz óz jumysyn usynǵan bolatyn. Kásibı biliktiligi men sheberligi synǵa túsken alaman báıgede Almaty qalasynan shyqqan 5 jeńimpaz qatarynda 1-oryndy Larısa Tıapýhına, «Geografııa/jaratylystaný muǵalimi», №144 mektep-gımnazııa, 2-oryn – Ásem Dúısenbaeva, Almaty memlekettik polıtehnıkalyq kolledji, 3-oryn – Gúlnur Almabaeva, №174 mektep-gımnazııa, 3-oryn – Gýlbaným Islamova, Aıgúl Kenshimbaeva, «Azamattyq avıasııa akademııasy» AQ Avıasııalyq kolledji, 3 oryn – Abaı atyndaǵy QazUPÝ aǵa oqytýshysy Qaısar Nurlybaev bar. Sharaǵa qatysqan ustazdar elimizdiń bilim berý salasynda osyndaı aýqymdy konkýrstyq jobanyń keńinen qanat jaıýy týraly usynystaryn bildirdi.