Qazaqstan Respýblıkasy Parlamenti Senatynyń Tóraǵasy Darıǵa Nazarbaeva parlamenttik tyńdaýlarǵa daıyndyq aıasynda fermer odaqtary men agroónerkásip kesheni ónimderin óndirýshiler qaýymdastyqtarynyń basshylarymen birqatar jumys kezdesýlerin ótkizdi. Bul týraly Parlament Senatynyń baspasóz qyzmeti habarlady.
11 jeltoqsanda astyq birlestikteriniń ókilderimen kezdesý boldy. Oǵan aýyl sharýashylyǵy óndirýshileri tarapynan «Qazaqstan astyq odaǵy» zańdy tulǵalar birlestiginiń tóraǵasy N.Ospanov, osy mekemeniń atqarýshy dırektory Sh.Badyhan, Qazaqstannyń astyq óńdeýshiler odaǵynyń prezıdenti E.Gan jáne odaqtyń dırektorlar keńesiniń múshesi D.Táýkebaev qatysty.
Sharaǵa Qazaqstan Respýblıkasy Parlamenti Senatynyń depýtattary R.Ákimov, B.Elamanov, M.Jumaǵazıev, A.Nuralıev, M.Taǵymov jáne Á.Qurtaev qatysty.
Kezdesýde sóz alǵan «Qazaqstan astyq odaǵy» zańdy tulǵalar birlestiginiń tóraǵasy Nurlan Ospanov eldegi astyq óndirisin ulǵaıtýǵa múmkindik beretin negizgi sebepterge toqtala kelip: aýyl sharýashylyǵy óndirýshileri shyǵyndardyń bir bóligi boıynsha memleket tarapynan ótemaqylardy qajet etetinin, sondaı-aq agrotehnologııalar men tuqymdyq materıaldy jaqsartý qajet ekenin jetkizdi.
О́simdikterdi qorǵaıtyn kónergen quraldar týraly da aıtyldy. «Bizde alqaptardyń lastaný deńgeıi óte joǵary. Egin alqaptarynyń lastyǵy 30 paıyzǵa deıin ónimdi joıady. Eger ósimdikterdi qorǵaý quraldaryn qoldanbaıtyn bolsaq sapaly ónim ala almaımyz. Búgingi kúni bizdiń tizilim 90-shy jyldardan bastap engen dári-dármekterder turady. Jańa dáriler ýaqyt ótken saıyn az tirkelýde», dedi N.Ospanov.
Qazaqstannyń astyq óńdeýshiler odaǵynyń prezıdenti Evgenıı Gannyń aıtýynsha, eksporttaýshylardy qoldaý júıesiniń joqtyǵy naryqqa qatysýshylardyń kóbine zardabyn tıgizip otyr. «Qazaqstan tutynýdan artyq un eksporttaıtyn jalǵyz el bolýyna qaramastan, shıkizat eksporttaýshylar áli kúnge deıin kóptegen qıyndyqtarǵa tap bolýda. Máselen, qosymsha qun salyǵyn qaıtarý máselesi óte ótkir bolyp otyr, óıtkeni táýekelderdi basqarý júıesi kez kelgen deńgeıde tekserý júrgize alady», dedi ol.
Kezdesýge qatysýshylar otandyq aýyl sharýashylyǵy tehnıkasyn jınaý jáne ony kádege jaratý alymy, sondaı-aq tarıftik shekteýlerdi, ulttyq kompanııalardyń satyp alý saıasatynyń sapasy men dempıngke qarsy baj máselelerin de qozǵady.
Senat Tóraǵasy Darıǵa Nazarbaeva kezdesýdi qorytyndylaı kelip, astyq salasyn damytý jónindegi aýyl sharýashylyǵy salasy ókilderiniń usynystaryn 2020 jylǵa josparlanǵan parlamenttik tyńdaýlarǵa daıyndaý úshin Qazaqstan Respýblıkasy Parlamenti Senatynyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine jiberýdi ótindi.