Avtokólikti aıdap ketkender – kúzet qyzmetkerleri

Tańǵy saǵat bes kezinde Aq­tó­be qalasynyń turǵyny polısııa bólimshesine qońyraý shalyp avto­kóligi urlanǵanyn habarlaıdy. So­dań soń osy derek boıynsha izge tús­ken saqshylar Qonaev kóshesi boıyn­daǵy №9 úıdiń janynan tórt jas azamattyń «VAZ-2114» av­tokóligin aıdap alyp ketkenin anyqtaıdy.

 Biraz ýaqyttan soń kezekshi patrýl qala syrtynda qarǵa mal­tyǵyp qalǵan «VAZ-2114»-tiń salonynda otyrǵandardy qolǵa túsiredi. Osy kezde olar dál jaýap berýden jaltaryp syrǵaqsı beredi. Munda bir gáp bar ekenin sezgen patrýlder ári-beriden keıin avtokólikti aıdap ketkender ózde­riniń áriptesteri ekenin bilip, aıran­asyr kúıge túsedi. Iаǵnı, bular Aq­­tóbedegi mamandandyrylǵan kúzet basqarmasynyń qyzmet­kerleri bolyp shyǵady. Az-kem ýa­qyt sózben yrǵasyp, táji­keleskennen keıin ustalǵandar patrýldik baılanys kezek­shi­lerine ózderiniń áriptes eken­­dikterin alǵa tartyp, bosatyp jiberýlerin suraıdy. Ári avtokólikti urlaý nemese tonaý úshin emes, jáı qy­zyq kórip seıildep qaıtý úshin aıdap ketkenderin aıtyp aqtalady. «Bul jerde biz qylmys jasadyq dep eseptemeımiz. Bar aıybymyz – áýes­qoılyq sezimniń jeteginde ketip qalǵanymyz. Mine, avtokólikti ózde­rińiz kó­rip tursyzdar. Murty da bu­zylǵan joq», dep aqtalady tórteý.

Alaıda olardyń bul ýáj­deri na­zarǵa alynbaı, pa­trýl­dik­ter kólik salonynda otyr­ǵan­dardyń qoldaryna kisen salyp, po­lısııa bólimshesine alyp ketedi. Qazirgi kúni Aq­tóbe oblystyq po­­lısııa departamentiniń men­shik­ti qa­ýipsizdik basqarmasy atal­ǵan derek boıynsha tıisti tek­­se­rýler júrgizýde. Avto­mo­bıl­di qymqyryp «seıil» qur­­ǵy­sy kelgenderdiń tórteýi de qyz­metterinen bosatylǵan.

AQTО́BE