Qazaqstannyń Táýelsizdik kúni qarsańynda atyraýlyqtar joǵary ataqtarǵa, ordender men medaldarǵa ıe boldy dep habarlaıdy О́ńirlik kommýnıkasııalar qyzmeti.
Mahambet atyndaǵy oblystyq akademııalyq qazaq drama teatrynda Táýelsizdik kúnine arnalǵan saltanatty jınalys ótti. Atyraý oblysynyń ákimi Nurlan Noǵaev atyraýlyqtardy merekemen quttyqtap, bul kúnniń eldiń táýelsizdik tarıhynda aıryqsha mańyzǵa ıe ekenin aıtty.
- Qazaqstan óz táýelsizdigin jarııalap, babalarymyzdyń ǵasyrlar boıǵy armanyna qol jetkizdi. Bizdiń býyn jańa Qazaqstannyń dúnıege kelý, qalyptasý kezeńinde ómir súrip, damýyna belsendi úles qosý baqytyna ıe boldy. Bizge halqymyzdyń bostandyq pen týǵan jerdi gúldendirý týraly armandaryn iske asyrý mártebesi men jaýapkershiligi júkteldi, - dedi Nurlan Noǵaev.
Aımaq basshysy Elbasy - Qazaqstannyń Tuńǵysh Prezıdentiniń sarabdal saıasaty arqasynda barlyq qazaqstandyqtyń qoldaýymen qıyndyqtardy birge jeńip, joǵary nátıjelerge jetkenimizdi atap ótti.
- Biz qazir sol qıyn da jaýapty kúnderdiń óteýindeı tabysqa jetip otyrmyz. Biz qazir ómirdiń barlyq synaqtaryn jeńýge kúsh-qaıratymyz jetetinin senimmen aıta alamyz. Memleket basshysy Qasym-Jomart Toqaevtyń azamattyq qoǵamdy damytý, ortalyq, jergilikti atqarýshy organdardyń máselelerin sheshýge halyqty tartý týraly alǵa qoıǵan mindetterin, tapsyrmalaryn tabysty oryndaıtynymyzǵa senemin. Azamattardyń birde-bir usynys-pikiri eskerýsiz qalmaıdy. Barshańyzǵa eldiń ıgiligi úshin atqaryp júrgen jumystaryńyzǵa rızashylyǵymdy bildiremin. Saıası turaqtylyq, qoǵamdyq kelisim men birlik damýymyzǵa negiz bolaryna senemin, - dep atap ótti Nurlan Noǵaev.
Saltanatty shara barysynda Qazaqstannyń órkendeýine úles qosqan túrli sala ókilderi memlekettik marapat aldy. Oblys ákimi «Parasat» ordenimen, «Shapaǵat», «Eren eńbegi úshin» medaldarymen, alǵys hattarmen ondaǵan atyraýlyqty marapattady.
Prezıdent Qasym-Jomart Toqaevtyń atynan aımaq basshysy Arys qalasyn qalpyna keltirý jumystaryna qatysqan bıznes ókilderin, qurylysshylardy marapattady.
Oblys ákimi Arysta kóp jumys atqarylǵanyn, qala turǵyndarynyń barlyq qazaqstandyqqa rızashylyǵyn atap ótti. Ortaq iske Atyraý oblysy da belsendi qatysty, bul halqymyzdyń qıyn sátterde birlik pen yntymaqta bola alatynyn kórsetti.
ATYRAÝ