Túrkistandaǵy №15 mekteptiń muǵalimin ájethana kúzetpegeni úshin ustap áketken qalalyq Polısııa basqarmasynyń bastyǵy qyzmetinen shettetildi dep habarlaıdy QazAqparat oblystyq PD baspasóz qyzmetine silteme jasap.
«13 jeltoqsan kúni Túrkistan qalasyndaǵy orta mektep muǵalimin polısııa bólimine jetkizý faktisi boıynsha Ishki ister mınıstri Erlan Turǵymbaevtyń buıryǵymen qalalyq Polısııa basqarmasy basshylyǵyna qatysty qyzmettik tekserý júrip jatyr. Tergeý kezinde ishki ister organdary qyzmetkerleriniń muǵalimge qatysty is-áreketiniń qanshalyqty zańdylyǵyna baǵa beriledi. Sondaı-aq Túrkistan qalasy Ishki ister basqarmasy bastyǵynyń laýazymyn asyra paıdalaný faktisiniń bar-joǵy anyqtalady» delingen habarlamada.
Oblystyq Polısııa departamenti basshysynyń buıryǵymen Túrkistan qalalyq Polısııa basqarmasynyń bastyǵy Danııar Meıirhan qyzmettik tekserý aıaqtalǵanǵa deıin qyzmetinen shettetildi.
Eske sala keteıik, Túrkistanda Maǵjan Jumabaev atyndaǵy №15 orta mekteptiń muǵalimi Baqyt Keýkenov «ájethana kúzetpegeni úshin» jazyqty bolǵan edi. 31 jyldyq ótili bar ustazdy qalalyq Polısııa basqarmasynyń bastyǵy, polısııa podpolkovnıgi Danııar Meıirhan bastaǵan bir top polıseı ustap áketken. Mektep dırektory K. Ábdiqadyrovanyń jazýynsha, muǵalim aıaq kıiminen sý ótken soń sony aýystyrý úshin mektep ǵımaratyna kirgen. Alaıda polıseıler qarsylyq kórsetkenine qaramastan ustazdyń qolyn qaıyryp, bólimshege alyp ketken. Keıin bul jaǵdaıdy estigen Bilim jáne ǵylym mınıstri Ashat Aımaǵambetov muǵalimge arasha tústi.
Búgin mektep muǵalimin «ájethana kúzetpegeni úshin» ustap áketken qalalyq Polısııa basqarmasynyń bastyǵy Danııar Meıirhan ustazdan keshirim suraǵan edi.