Elordada Táýelsizdik kúni merekesi qarsańynda qazaq ádebıetiniń alyptary Sáken Seıfýllın, Ilııas Jansúgirov jáne Beıimbet Maılınge eskertkish ornatyldy. Bul týraly qala ákimi Altaı Kólginov Facebook-tegi paraqshasynda jazdy.
Bıyl Úsh arystyń týǵanyna 125 jyl tolyp otyr.
«Ultymyzdyń tar jol taıǵaq keshken jyldaryn romanynyń ataýymen astarlap jetkizip, qazaq ataýyn qujat júzinde qaıtarǵan Sáken Seıfýllın murasynyń bizdiń rýhanııatymyzda alatyn orny erekshe. Búginde qalamyzda mýzeıi jumys isteıdi. Endi mine eskertkishi ashylyp otyr. Beıimbet Maılın óziniń jazýshylyǵymen qatar, eldi saýattylyqqa úndep, alǵashqy «Qazaq» gazetine, «Aıqap» jýrnalyna jáne basqa da basylymdarǵa turaqty máselelerdi jazǵan jýrnalıstigimen de kóp eńbek sińirdi. Dramatýrgtyǵy bir tóbe. Áńgimeleri áli kúnge deıin ózektiligin joımaı, jas urpaqty tárbıeleý máselesinde paıdalanylyp keledi. Ilııas Jansúgirov – qazaq folkloryn damytqan tulǵa. «Kúıshi«, «Qulager« poemalary – tunǵan tarıh. «Uly dalanyń jeti qyry» atty maqaladaǵy keleli oılardyń negizinde dúnıege kelgen bul týyndyny kóptiń qýanyshy dep bilemin. Bul eskertkish ótkenge qurmet qana emes, tarıhymyzǵa qoıylǵan biregeı belgi, bolashaqqa degen kámil senim. Azat eldiń astanasy – Nur-Sultan qalasynyń tórinde taǵdyry da bir, ómiri de uqsas ultymyzdyń Uly perzentterine arnalǵan eskertkishtiń turýy – zańdylyq. Jas urpaqqa úlgi-ónege bolady degen úmittemin», - dedi A.Kólginov.
Sondaı-aq elorda tórinen Jazýshylar úıi ashyldy. Bul is-sharalarǵa Jazýshylar odaǵynyń basqarma tóraǵasy Ulyqbek Esdáýlet, aqyn-jazýshylar Marfýǵa Aıtqojına, Ánes Saraı, Nesipbek Aıtuly, Jazýshylar odaǵy Nur-Sultan qalalyq fılıalynyń tóraǵasy Dáýletkereı Kápuly, sondaı-aq, jas qalamgerler qatysty.