Almatydaǵy Dostyq úıinde Táýelsizdik merekesine oraı rýhanı qundylyqtardy nasıhattaý maqsatynda jetim balalar men az qamtylǵan otbasy balalaryna arnalǵan «Qyzǵylt flamıngo týraly ańyz» mýzykalyq-teatrlandyrylǵan kompozısııasy ótti.
Otanǵa degen súıispenshilikti arttyrý, úlkenge qurmet, kishige izet sııaqty izgi qasıetterdi nasıhattaı otyryp uıymdastyrylǵan sharaǵa T.Júrgenov atyndaǵy Qazaq ulttyq óner akademııasynyń «Qazaqstan tarıhy jáne áleýmettik ǵylymdar» kafedrasy muryndyq bolyp otyr.
Balalarǵa arnalǵan erekshe jobany birinshi kýrs stýdentteri daıyndap, mýzykalyq-teatrlandyrylǵan qoıylymǵa professor M. D. Shaımerdenova jetekshilik etti.
Joba aıasynda meıirimdilik pen zulymdyqty, ana mahabbatynyń kúshi, halyq danalyǵy men týǵan ólkeniń sulýlyǵyna arnalǵan qazaq ertegisi negizinde qoıylǵan teatr kórinisi jańa ınnovasııalyq tehnologııalar men zamanaýı ádisterimen erekshelendi.
Balalardyń erekshe qyzyǵýshylyǵyn oıatqan áserli kezdesýde sheberlik saǵattary, joba taqyryby boıynsha magıstranttardyń sýret kórmesi, «Ertegiler álemine saıahat» kitap kórmesi uıymdastyrylyp, merekelik syılyqtar úlestirildi.