Búgin Májiliste Palatanyń jalpy otyrysy ótti. Onda depýtattar ǵarysh salasyndaǵy Qazaqstan-Reseı yntymaqtastyǵyn kózdeıtin «2004 jylǵy 22 jeltoqsandaǵy Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkasııalaý týraly» zańynyń jobasyn maquldady. Bul týraly Parlament Májilisiniń baspasóz qyzmeti habarlady.
Hattamaǵa Máskeýde 2018 jylǵy 22 tamyzda qol qoıyldy jáne onda «Báıterek» ǵarysh zymyran keshenin qurý jónindegi jobany iske asyrýdyń negizgi sharttary men qazaqstandyq jáne reseılik taraptar arasynda jobanyń iske asyrylýyn qarjylandyrýdy bólý týraly aıtylady.
Hattama erejelerine sáıkes qazaqstandyq tarap: reseılik tarap jalǵa alatyn obektiler quramynan shyǵarylǵannan keıin bazasynda «Báıterek» keshenin qurý kózdeletin «Zenıt-M» ǵarysh zymyran kesheniniń jerústi ǵarysh ınfraqurylymy obektilerin ustaýdy jáne paıdalanýdy; «Zenıt-M» ǵarysh zymyran kesheniniń jerústi ǵarysh ınfraqurylymy obektilerin rekonstrýksııalaýdy jáne jańǵyrtýdy; starttyq jáne tehnıkalyq keshenderdi paıdalaný boıynsha personaldy daıyndaýdyń oqý-jattyǵý quraldaryn jasaýdy; Qazaqstan Respýblıkasynyń aýmaǵynda tasymaldaǵysh zymyrandardyń bólinetin bólikteriniń qulaý aýdandaryn bólýdi; telekommýnıkasııalyq jáne aqparattyq qamtamasyz etý júıesin jańǵyrtýdy qarjylandyrýdy qamtamasyz etedi.
Sondaı-aq Hattamamen «Zenıt-M» ǵarysh zymyran kesheniniń obektilerin jaldaýdan shyǵarý jáne olardy qazaqstandyq tarapqa berý jáne ekologııalyq qaýipsizdik deńgeıi joǵary orta klasty tasymaldaǵysh zymyrandardy paıdalaný kózdelgen. Qaralyp otyrǵan Hattamany ratıfıkasııalaý jáne onyń keıinnen kúshine enýi Qazaqstanǵa jerústi ǵarysh ınfraqurylymynyń menshikti obektilerin paıdalana otyryp, iske qosý qyzmetin júzege asyratyn memleketterdiń qataryna qosylýǵa múmkindik beredi.
Sonymen qatar búgingi otyrysta depýtattar «Qazaqstan Respýblıkasynyń keıbir zańnamalyq aktilerine eńbek máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasynda Eńbek kodeksine, Ákimshilik quqyq buzýshylyq týraly kodeksine, sondaı-aq «Áskerı qyzmet jáne áskerı qyzmetshilerdiń mártebesi týraly» jáne «Kásiptik odaqtar týraly» zańdaryna ózgerister men tolyqtyrýlar engizý kózdelip otyr.
Atap aıtqanda, zań jobasynda: eńbek sharttaryn esepke alýdy avtomattandyrý maqsatynda eńbek shartyn elektrondyq nysanda jasasý tártibin bekitýge; jumys berýshilerdiń jumyskerlerge eńbek jáne turmys boıynsha laıyqty jaǵdaılar jasaý jónindegi mindetin belgileýge; azamattardyń merzimdi áskerı qyzmet ótkerý kezeńinde jumys berýshiniń kórsetilgen ýaqyt kezeńine jalaqysy saqtalmaıtyn demalys berý jónindegi mindetimen tolyqtyryla otyryp, jumys ornyn saqtaýǵa; otbasynyń naýqas múshesine kútimdi júzege asyratyn jumyskerlerge tolyq emes jumys ýaqyty rejımine quqyq berýge baǵyttalǵan normalar, sondaı-aq jumys oryndaryndaǵy kásiptik táýekelderdi baǵalaý jáne basqarý negizinde eńbekti qorǵaýdy basqarý júıesin engizýge baǵyttalǵan túzetýler usynylyp otyr.
Zań jobasynyń normalaryn jan-jaqty talqylaý maqsatynda múddeli memlekettik organdardyń, sondaı-aq kásiptik odaqtar organdarynyń ókilderimen jumys kezdesýleri uıymdastyryldy. Jumys kezdesýlerin eńbekti qorǵaý jáne eńbek qaýipsizdigine, kásiptik odaqtardyń qyzmetin jetildirýge, eńbek salasynda quqyqtyq jáne áleýmettik kepildikterdi qamtamasyz etýge baǵyttalǵan zań jobasynyń erejelerin iske asyrý tetigimen baılanysty máseleler talqylandy.
Jalpy otyrys sońynda halyq qalaýlylary ortalyq memlekettik atqarýshy organdardyń basshylaryna depýtattyq saýaldar joldady. Olar D.Myńbaı, J.Dúısebaev, R.Kım, A.Qońyrov, D.Espaeva, A.Perýashev.