Naýryz meıramy kúnderi elimizdiń aqparat keńistigi taǵy bir basylymmen tolyqty. Gazettiń bas redaktory, elimizge belgili sport jýrnalısi Qydyrbek Rysbektiń aıtýynsha, “Qazaq sporty” atalatyn basylym aptasyna bir ret, seısenbi kúni shyǵatyn bolady.
Gazettiń tyrnaqaldy nómiri qyzyqty da tartymdy dúnıelermen jáne olarǵa saı berilgen ádemi sýrettermen shyqqanyn atap ótkenimiz jón. Basylymnyń alǵashqy nómirinde “Tarazy”, “Topjarǵan”, “Saraptama”, “Jylnama”, “Sóz óneri dertpen teń” jáne sporttyń ár túrine baılanysty berilgen aıdarlarmen jarııalanǵan maqalalar bar. Munda Týrızm jáne sport mınıstri Temirhan Dosmuhambetovtiń “Aq olımpıada artta qaldy, alda – Azııa oıyndary” atty materıaly, dzıýdo kúresinen Qazaqstan sporty tarıhynda tuńǵysh ret álem chempıony atanǵan Maksım Rakovpen júrgizilgen suhbat, belgili jýrnalıster Dúráli Dúısebaıdyń “Sóz bilmeıtin kommentator kóp”, Ǵalym Qojabektiń “Qazaq boksy: Toqyraý ma, álde tolqyn aýysý ma?”, Tóleýbek Qadyrmolla men Sábıt Tastanbekulynyń jarystardan bergen reportajdary shyqqan. Al gazettiń sońǵy betinde “Men – qazaqpyn!” aıdarymen berilgen redaktordyń sporttyq gımnastıkadan Kanada ulttyq quramasynyń bas bapkeri, qazir osy eldiń astanasy Ottava qalasynda turatyn qandasymyz Edige Jarovtan alǵan suhbaty oqyrman qaýymnyń izdep júrip oqıtyn dúnıesi desek artyq aıtqandyq emes.
“Astana Polıgrafııa” baspasynan oqyrmanǵa jol tartqan gazet 10 myń taralymmen shyǵyp otyr.
Dastan KENJALIN.