Búgin Dýshanbede Qazaqstan medısınasynyń kúnderi bastaldy. Eki kúndik sharaǵa elimizdiń Densaýlyq saqtaý vıse-mınıstri Oljas Ábishev bastaǵan 30-dan astam delegat qatysyp otyr. Olardyń qatarynda otandyq jetekshi medısınalyq uıymdar men klınıkalardyń birinshi basshylary, sanatorlyq-kýrorttyq uıymdardyń qyzmetkerleri, farmkompanııalar, medısınalyq ýnıversıtetterdiń rektorlary bar.
Eki memlekettiń densaýlyq salasyndaǵy yntymaqtastyqty nyǵaıtýǵa baǵyttalǵan sharanyń birinshi kúni forým men qazaqstandyq medısına jetistikteriniń kórmesi ótedi.
Forým barysynda Qazaqstandaǵy medısına salasyndaǵy reformalar, praktıkalyq medısınada qoldanylatyn ınnovasııalar men ozyq tehnologııalar tanystyrylyp, otandyq medısınanyń múmkindikteri men jetistikteri baıandalatyn prezentasııalar jasalynatyn bolady. Taraptar óz tájirıbelerimen, ınnovasııalyq jáne tehnologııalyq jetistikterimen almasady. Dıalogtyq alańda medısınalyq týrızmdi damytý, ana men balanyń densaýlyǵyn qorǵaý, reprodýktıvti hırýrgııanyń jetistikteri, kardıologııa salasynda zamanaýı tehnologııalardy qoldaný, kardıohırýrgııalyq qyzmetti damytý jáne densaýlyq saqtaý salasyn sıfrlandyrý jáne t.b. medısınadaǵy ózekti máseleler talqylanady.
Erteń Dýshanbedegi jetekshi medısınalyq uıymdarynda sheberlik synyptary men konsýltasııalar ótkiziledi.
Forýmǵa Pedıatrııa jáne balalar hırýrgııasy ǵylymı ortalyǵynyń Basqarma tóraıymy Rıza Boranbaeva, ortalyqtyń bilikti dárigeri Rústem Bıshmanov qatysýda. Ortalyq delegattary sapar barysynda keshe Respýblıkalyq onkologııalyq ǵylymı ortalyǵynda boldy. Kezdesý barysynda Pedıatrııa ortalyǵynyń basshysy R.Boranbaeva «Qazaqstandaǵy Pedıatrııa — múmkindikteri men keleshegi» taqyrybynda tanystyrylym jasap, Tájikstan onkologııalyq ortalyǵynyń qyzmetimen tanysty.