Táýelsizdik Saraıynda Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń ekinshi otyrysy ótip jatyr.
Jıynda sóz alǵan Prezıdent keńesshisi Erlan Qarın alǵashqy Ulttyq qoǵamdyq keńes otyrysynan keıingi aralyqta oryndalǵan jumystar jaıynda aıtty.
- Eń aldymen Ulttyq qoǵamdyq keńes músheleriniń barlyq aıtylǵan usynystary jınaqtaldy. Josparǵa engizildi. Osy ýaqyt aralyǵynda belsendi túrde jumys atqaryldy. Atap aıtqanda, negizgi jumys 3 baǵytta uıymdastyryldy. Birinshiden, Prezıdent Ákimshiliginiń basshysy, Prezıdent Ákimshiligi basshysynyń orynbasary deńgeıinde jáne Premer-Mınıstrdiń orynbasary deńgeıinde jumys jınalystary ótti. Ol jınalystarda Ulttyq qoǵamdyq keńes músheleri múddeli memlekettik organdarynyń ókilderi qatysyp, qajetti ekonomıkalyq jáne áleýmettik, mádenı salalarda usynylǵan reformalar aıasyndaǵy jekelegen suraqtardy qarady. Berilgen merzim sheginde jalpy joǵary deńgeıde Aqorda men Úkimet úıinde 18 jumys jınalysy men túrli talqylaýlar uıymdastyryldy, - dedi Erlan Qarın.
Keńestiń negizgi maqsaty – jurtshylyqtyń, saıası partııalardyń, azamattyq qoǵam ókilderiniń qatysýymen memlekettik saıasatqa qatysty ózekti, mańyzdy máseleler boıynsha bastamalardy, usynystardy tujyrymdaý. Al memlekettik baǵdarlamalar men normatıvtik-quqyqtyq aktilerdiń jobalaryna qoǵamdyq saraptama júrgizý, azamattyq qoǵamnyń pikirin eskere otyryp mańyzdy strategııalyq problemalardy qaraý, syndarly dıalogty qamtamasyz etý – keńestiń negizgi mindetteri.
Sharaǵa Keńes músheleri men BAQ ókilderi qatysyp jatyr.