Qyzylorda oblystyq Qazaqstan halqy assambleıasy janyndaǵy jastar qozǵalysynyń uıymdastyrýymen «Jastar jańǵyrý jolynda» atty forým ótti.
Sharada oblystyq Qazaqstan halqy assambleıasy tóraǵasynyń qoǵamdyq negizdegi orynbasary Ildar Gafýrov jyl boıyna atqarylǵan jumystardy saralap ótti.
- Bıyl «Jańǵyrý joly» jastar qozǵalysy bekitken Jol kartasyn júzege asyrýda jastar saıasaty máseleleri basqarmasy, jastar resýrstyq ortalyǵy, «Jas Otan» jastar qanaty birigip, biraz bastamalardy júzege asyrdy. Ásirese, óńirimizde etnosaralyq tatýlyq pen birlikti nasıhattaýǵa baǵyttalǵan «Syr eli - dostyq mekeni» jobasyn, qaıyrymdylyq aksııalaryn aıryqsha atap ótkenimiz jón. Elbasynyń «Rýhanı jańǵyrý» baǵdarlamalyq maqalasy aıasynda patrıottyq tárbıelik máni bar kezdesýler, ulttyq sport túrleri boıynsha saıystar ótkizildi. Sondaı-aq jastar úshin óz týǵan jeriniń tól tarıhyn taný maqsatynda «Uly dala eli» atty tarıhı-tanymdyq ekspedısııa uıymdastyryldy, – dedi Ildar Gafýrov.
Bıyl «Jańǵyrý joly» JQ sleti Jańaqorǵan aýdanyndaǵy «Taldysý» lagerinde ótkizilip, jastar úshin túrli semınar-trenıngter uıymdastyryldy.
Jyl aıasyndaǵy taǵy bir jańalyq – oblystyq Qazaqstan halqy assambleıasynyń bastamasymen «Qaıyrymdylyq kerýeni» jobasy aıasyndaǵy kúzgi tal egý ekologııalyq aksııasy boldy. Onda «Jańǵyrý joly» JQ músheleri, etnomádenı birlestik jastary oblystyq balalarǵa arnalǵan aýrýhana aýlasyna 200-den asa tal otyrǵyzdy.
Jyldyń jetistigin aıtyp ótken oblystyq QHA tóraǵasynyń orynbasary keıingi tolqyn ókilderi aldaǵy Volonter jyly aıasynda uıymdastyrylatyn sharalarǵa da belsene qatysatynyna senim bildirdi.
Jastar jylyn qorytyndylaǵan forýmda birqatar oqý oryndary men mekemelerge marapat tabystalyp, shara sońy konsertke ulasty.