Qyzylorda oblysy tabysy az, kópbalaly otbasylarǵa jáne múgedek balalardy tárbıelep otyrǵan adamdarǵa kásipkerlik daǵdylardy damytýǵa jáne óz isin ashýǵa qoldaý sharalaryn usynýǵa baǵyttalǵan «Meniń kásibim» jobasy sátti iske asyrylyp jatqan besinshi aımaq boldy. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Bul jobany tikeleı avtory Aıjanı Nurlanova jergilikti atqarýshy organdardyń qoldaýymen júzege asyrýda. Ol oblys ákimi Naýryzbaı Baıqadamovpen tıisti memorandýmǵa qol qoıdy. Jalpy úılestirýdi Eńbek jáne halyqty áleýmettik qorǵaý mınıstrligi júzege asyratyn bolady.
Joba avtory muqtaj azamattarǵa úı kásibin júrgizýge qaıtarymsyz negizde qajetti ınventarlar, jabdyqtar men materıaldar usyný túrinde kómek kórsetedi.
Aıjanı Nurlanovanyń aıtýynsha, osy áleýmettik baǵdarlanǵan jobanyń qatysýshylary úıden shyqpaı-aq nesıe, kepilsiz jáne tabysyn rastamaı-aq óz isin asha alady. Bul úıde nan ónimderin pisirý, kıim jáne úı matalaryn tigý jáne taǵy basqalar bolýy múmkin. Qatysýshylarǵa qoıylatyn basty talap – tabys tabýǵa umtylý jáne bızneske jaýapkershilikpen qaraý.
Aıjanı Nurlanova osyndaı jobany pılottyq rejımde Mańǵystaý oblysynda sátti júzege asyrdy, onda 250-ge jýyq adam jeke kásipkerlikti júrgizýdiń negizgi daǵdylaryna oqytylyp, óz isin ashty.
Qazirgi ýaqytta «Meniń kásibim» jobasy Almaty jáne Túrkistan oblystarynda, Almaty jáne Shymkent qalalarynda iske asyrylýda. Aldaǵy ýaqytta ony iske qosý boıynsha memorandýmdar barlyq óńirlerdiń ákimdikterimen jasalatyn bolady.