Bıyl qazaqtyń án ónerin baıytqan kompozıtor Beksultan Baıkenjeevtiń týǵanyna 70 jyl. О́ziniń týyp-ósken Jańaqorǵanynan taban aýdarmaǵan óner ıesi shyǵarmashylyqty damytýdyń múmkindigi mol megapolısten shalǵaıda júrip-aq tyńdaǵannyń janyn terbeter tamasha týyndylar jazdy.
Osy jyldyń qyrkúıeginen beri aımaqtyń túkpir-túkpirinde Beksultan Baıkenjeev shyǵarmashylyǵyna arnalǵan keshter ótti. Solardy qorytyndylaǵan shara – respýblıkalyq «Syrdarııa» ánshiler konkýrsy jýyrda Jańaqorǵan kentinde uıymdastyryldy. Manap Kókenov atyndaǵy aýdandyq mádenıet úıinde ótken shara aldynda jınalǵandar kompozıtor eskertkishine gúl shoqtaryn qoıyp, rýhyna qurmet tanytty.
Oblystyq halyq shyǵarmashylyǵyn damytý jáne mádenı-prodıýserlik ortalyǵy men aýdandyq mádenıet jáne tilderdi damytý bólimi uıymdastyrǵan baıqaýda elimizdiń ár túkpirinen jınalǵan 15 ánshi baq synady. Elin ánmen áldılegen darynnyń rýhyn ulyqtaýǵa arnalǵan keshti aýdan ákiminiń orynbasary Ǵalymjan Sopbekov ashyp, úmitkerlerge sáttilik tiledi.
Baıqaýdyń sharty boıynsha ónerpazdar áýeli Beksultan Baıkenjeevtiń týyndysyn, sosyn halyq ánin oryndaýy tıis boldy.
Belgili ánshi, Beksultannyń shákirti Dúısenhan Syzdyqov bastaǵan qazylar alqasynyń uıǵarymymen Mıras Ajıkov (Batys Qazaqstan), Álfarabı Bekarysuly (Shıeli), Ádilhan Maqsatbaev (Qazaly), Erbol Raısov (Shıeli), Saljeken Baqytbek (Qazaly), Jandos Sansyzbaev (Qyzylorda), Juldyz Shúkirbaeva (Shymkent) jáne Baǵlan Shýbaevqa (Jambyl oblysy) yntalandyrý syılyǵy berildi. Úshinshi oryn júldesi Muhtar Baıjanov (Aral), Aıbol Ábdirasyl (Qyzylorda) jáne Aıbek Shúkirovke (Qyzylorda) buıyrdy. Sharaǵa Mańǵystaý oblysynan kelip qatysqan Marat Safarov pen qyzylordalyq Islam Naǵyzhan ekinshi orynǵa laıyqty boldy. Birinshi oryndy Túrkistan oblysynan kelgen Asylbek Beıisov alsa, bas júlde ıegeri Almaty oblysynyń ókili Isahan Súleımenovke buıyrdy.
Keshte belgili ánshiler Jeńis Ysqaqova, Dúısenhan Syzdyqov, Saýran Eleýov, Aqmaral Noǵaıbaeva men jergilikti ónerpazdar kompozıtor týyndylaryn oryndap, óner ıesiniń el rýhanııatyndaǵy órnekti joly óshpeıtindigin kórsetti.