Qurlyqtyq hokkeı lıgasynda (QHL) synǵa túsip jatqan Nur-Sultannyń «Barys» klýby «Barys Arenada» Sankt-Peterbýrgtiń SKA komandasymen oınady.
Elordalyqtar SKA-ǵa qarsy oıyndy tamasha bastady. Matchtyń nebári 11-sekýndynda Atte Ohtamaa jyldam gol soǵyp, oıyndy tamashalaýǵa kelgen alty myńnan asa jankúıerge qýanysh syılaǵan bolatyn. Alaıda bul qýanysh uzaqqa sozylmady. Aınaldyrǵan 9 mınýttyń ishinde SKA hokkeıshileri úsh gol soǵyp, tarazy basyn ózderine aýdardy. Al 13-mınýtta Alekseı Maklıýkov esep aıyrmasyn qysqartqanymen, ekinshi kezeńde Sankt-Peterbýrg komandasy taǵy úsh gol soqty. 25-mınýtta Naıl Iаkýpov, 28-mınýtta Vasılıı Tokranov mergendigimen kózge tússe, 38-mınýtta Artem Zýb oıyndaǵy úshinshi, jalpy matchtyń sońǵy golyn soqty.
Osylaısha, «Barys» qatarynan ekinshi oıynda jeńilis tapty. Al SKA komandasyn segizin oıynnan beri jeńe almaı keledi. Jerlesterimiz Sankt-Peterbýrg klýbynan sońǵy ret 2015 jyly basym túsken bolatyn. «Barys» kelesi kezdesýin búgin Máskeýdiń «Dınamo» komandasymen ótkizedi.